Қылмыскерді құрықтаған қос қыран

Ал ұлттық патриотизм, аза­мат­тық ұстаным деген қа­сиеттің бәрі де таңдаған маман­дыққа деген құрметтің белгісі. Біз әдетте мамандыққа адал­дық тура­лы көп айтамыз. Ел ал­дын­да­ғы парыз дегенді де жиі әң­гі­ме қыламыз. Ал мамандыққа адал­дық іс аясында көрініс тапса, туған ел алдындағы парыз өмір сүру барысында өтеледі. 
Осыдан алты жыл бұрын қа­ра­шаның қара суығында Тараз көшелерінде қиғылық салған қылмыскерді құрықтау кезінде қаза тапқан полиция капитаны Ғазиз Байтасовтың ерлігі бүгінде аңызға айналды. Туған халқы­ның есінде өнеге болып өрнек­тел­ді. Елбасы Жарлығымен «Халық Қаһарманы» атағы беріліп, халық жадында мәңгі сақталды. Ал ерлік те ұрпақтан­ұрпаққа жалғасып, буын сайын алмасып тұратын ерекше құбы­лыс. Ол кімнің тағдырына жа­зыл­ған, кімнің жүрегінде қалып­тас­қан, ешкімге белгісіз. Әлгі айтыл­ған іс аясында, өмір сүру бары­сында белгілі болатын тағдыр жазуы.
Өткен жылы да Тараз қала­сында атыс орын алып, ел үшін төбеден жай түскен­дей бол­ған еді. Әрине, мұндай­да ха­лық тағы да тәртіп сақшы­лары­нан көмек күтеді. Себебі, ар­қа тұтар айбар еліміздің ішкі іс­т­ер саласы. Талай қылмыс­тың ал­дын алып, талай қылмыс­керді қия бас­тырмаған тәртіп сақшы­лары­ның қызметі шынында да ерлік­пен бірдей. Оқиға былай болған. 
Тәртіп сақшыларына қару­лан­ған белгісіз біреулердің бей­біт тұрғындарға шабуыл жаса­ғаны туралы хабар келіп түседі. Расында да шаһардың алтыншы шағын ауданында белгісіз біреу қару қолданып, елді үркіткен. Сол маңда кезекшілік қызмет ат­қарып жүрген полиция сер­жанты Бекжан Тіленшиев бір­ден қырағылық танытып, шұғыл түрде қылмыскердің ізіне түседі. Ал тура сол жердегі бір үйге шақырту бойынша келген поли­ция аға лейтенанты Данияр Зәуірбек бұл жағдайды байқап қалып, ол да бірден қылмыскерді құрықтауға әрекеттенеді. Бірақ сол кезде көпқабатты үйлердің кіреберісіне жасырынған қыл­мыс­кер Бекжан Тіленшиевті ауыр жарақаттайды. Оқиғаға куә болған Данияр Зәуірбек болған жайды былай баяндайды. 
«Былтыр 19 маусым күні алтын­шы шағын ауданда ішімдік ішіп, мас күйінде жүрген адам тура­лы хабарлама келді. Бірақ күт­пеген жағдайға куә болдым. Шақыр­ту түскен бойда сонда кел­генім­де, полиция сержанты Бек­жан Тіленшиевті әлгі қыл­мыс­кер ауыр жаралапты. Мен де оқи­ға орын алған №18 көпқа­бат­ты үйдің кіреберісінде тұрып, оған қару кезену арқылы сыртқа сытылып шықтым. Шықтым да талдың түбінде әлгі қылмыскерді күтіп тұрдым», дейді Данияр Мәскеубекұлы. 
Содан біраз уақытқа созыл­ған текетірестен соң, Данияр өзі қорғана жүріп, екі рет көздеп ату арқылы қылмыскерді залал­сыз­дандырады. Полиция аға лейтенантының қырағылығы және жедел әрекет етуі нәтиже­сін­де бейбіт тұрғындарға қауіп төн­дірген қылмыскер оқшау­­ланады. Өміріне қауіп төн­ген қос азамат міндетін мүл­тік­сіз атқару арқылы аман қалған. 
Данияр Зәуірбек 2012 жыл­дан бері ішкі істер саласын­да қыз­мет етіп келеді. Бүгінде по­ли­­ция капитаны атанған ол «Ту­ған еліме адал қызмет ету және бейбіт тұрғындардың қауіп­сіз­дігін қорғау – азаматтық мін­детім», дейді. Тараз қалалық ішкі істер басқармасы жергілікті поли­ция қызметінің учаскелік по­ли­ция инспекторы қызметін ат­қарып жүрген жас жігіт бұл әре­ке­тін ерлік деп ойламайды. Қайта мұны қызметтік міндетім деп түсінеді.
 Алайда, қылмыскерге қарсы күрес ерлікке саналады. Әйтпесе бейбіт тұрғындардың жаза­тайым оққа ұшуы мүмкін. Бір-бірі­мен жолы қызмет ету барысында түйіскен қос азаматқа жуыр­да ғана Елбасы Нұрсұлтан Назарбаевтың Жарлығымен «Ерлігі үшін» медалі берілді. Сондай-ақ, Данияр Зәуірбек Қазақстан Респуб­лика­сының Ішкі істер министрі, генерал-полковник Қалмұханбет Қа­сымовтың Алғыс хатын алған. Жамбыл облыстық ішкі істер де­пар­таментінің басты­ғы, гене­рал-майор Тілеген Мат­кенов­тің қолынан да сый­лық алып­ты. Мұның бәрі де ерлік­ке көр­сетілген құрмет екені сөзсіз. Ер­лік­тің ешқашан ұмытыл­май­ты­нын дәлелдеген жағдай осы. 
  Полиция сержанты Бекжан Тіленшиев те 2012 жылдан бері ішкі істер саласында қызмет етіп келеді. Бекжан Мамырұлы – мамандығын мақтанышы көретін азаматтардың бірі. Қыл­мыскерді қолға түсіру кезінде дене жарақатын алып, тағдыры сын сағатта сергелдеңге түскен сәтте де мойымады. Қайта қару­ланып, күш-қайраты арта түсті. Ең бастысы – ел аман, жұрт ты­ныш. Тап сол оқиғадан зардап шек­кен адам жоқ. Бұл да үлкен жетіс­тік, айта қаларлық абырой. Әр­дайым жақсы жағынан ғана көр­ініп, мамандығына адалдық таны­тып жүрген қос азамат талай елге қауіп төндіруі мүмкін қыл­мыс­кердің жолын осылай кесті. 
 Қылмыскерді құрықтаған қос қыранның, халық қауіпсіздігін қамтамасыз етуде ешқашан аян­бай­тын азаматтардың әлі де абы­рой биігінен көрінетініне се­нім мол. Өміріне қауіп төнсе де қара басын арашалап қалуға ұм­­тыл­­май, орын алуы мүмкін апат­­тың ал­дына шыққан азамат­та­рға ке­йінгі буын да құрметпен қарайды. 

Хамит Есаман,
«Егемен Қазақстан» 

Жамбыл облысы