«Нұр Отан» халықтық-демократиялық партиясы «Жас Отан» жастар қанатының ұйымдастыруымен жыл сайын өткізетін еліміздің 14 облысы мен Астана және Алматы қалаларындағы «Қазақша сөйлесейік!» қоғамдық республикалық шарасы 3 жылдан бері үздіксіз жалғасып келеді.
Осыған орай, жақында Астана қаласының теміржол сапаржайында Мемлекеттік тілді дамыту Президенттік қорының қолдауымен «Қазақша сөйлесейік!» атты қоғамдық республикалық акция өтті. Қоғамдық жолаушылар тасымалдайтын орын болғандықтан, өткен-кеткен жүргіншілер қызығушылық танытып, өз пікірлерін білдіріп жатты. Өз ана тіліне шорқақ кей қандастарымыздың бар кінәні кеңестік дәуірдің қатал саясатына аударып, ақталатындары жасырын емес. Әйтсе де «өз бетімізше үйреніп жатырмыз», – деген секілді жылы пікірлері жанымызды жадыратты. Бұл ретте, мемлекеттік қызметте жұмыс істейтін өзге ұлт өкілдерінің қазақ тілін үйренуге деген талап-талпыныстары жоғары екендігін атап өткен маңызды. Көпшілік тарапынан әсіресе, сөздікке қоса берілген дискі, бүктеме-плакаттарға сұраныс ерекше болды. Игілігіне жаратса.. Бұны жақсылықтың нышанына баладық.
Шара мақсаты – мемлекеттік тілдің қоғамдағы рөлі мен маңызын арттыру, қазақ тілінің қолданыс аясын кеңейтіп, халық арасында кеңінен насихаттау. Іс-шара бұдан былай да еліміздің барлық аймақтарын қамтитын болады.
Раушан ТӘУІРХАНҚЫЗЫ, журналист.