Индустрияландыру бағытындағы істер

Премьер-Министрдің орынбасары – Индустрия және жаңа технологиялар министрі Әсет Исекешев бастаған үкіметтік топ өңірдегі индустриялық бағдарламаның іске асырылу барысымен танысу үшін Қарағанды облысында болды. Сапар барысында үкіметтік топ «Kazplast» ЖШС қазақстандық-болгар кә­сіп­орнына барды. Онда кең ауқымды полиэтилен бұ­йым­дары өндірісі іске қосылған. Кәсіп­орын жылына 390 тонна полимер өнімін шы­ғарады. Кәсіпорынның құрылысында және өнім өндірісінде тек қана қазақ­стан­дық құры­лыс материалдары мен шикізат пайдаланылды. Бұдан басқа, үкіметтік топ «Машзавод №1» ЖШС-ның прототиптеу кешені жұ­мы­сымен және қызметімен танысты. Кә­сіп­орын өнімі тау-кен өндіру және мұнай-газ өнеркәсібінде, металлургияда және кө­лік саласында сұранысқа ие. Зауыт шы­ға­ратын гидравликалық жабдықтың 90%-ын ТМД елдеріне экспорттайды. Бұған қоса делегация «Караганда Энергоцентр» ЖШС өндірістік қуаттылы­ғын жаңғырту және кеңейту бойынша жұ­мыс барысымен танысты. Қазір объектіде жаңа жабдық орнату бойынша құрылыс- монтаж жұмыстары жүргізілуде. Объек­ті­нің өндірістік қуаты – 425 МВт, 1157,5 Гкалл/сағ. Жобалық қуатқа шығу келесі жылға жоспарланған. Жалпы, Индустрияландыру картасы шеңберінде осы жылы Қарағанды облы­сында 24 жобаны іске асыру жоспарлануда. Оның ішінде 9 жоба бірінші жарты­жыл­дықта қолданысқа енгізілді. Кәсіпорындарды аралағаннан кейін, об­лыстық әкімдікте ҮИИДБ шеңберінде бизнесті қолдау құралдарына арналған кеңес өтті. Әсет Исекешев жаңа индустриялық саясат шеңберінде мемлекет, ең алдымен, ҮИИДБ-ның стратегиялық бағыттарын іске асыруға тартылғандарды қолдайтынын еске салды. «Егемен-ақпарат».