Елеусіновтің екпіні

Кеше Бакуде бокстан өтіп жатқан әлем чемпионатының бесінші күні біздің құрамадан шаршы алаңға 64 кило салмақтағы Данияр Елеусінов шығып, шотландиялық Джош Тэйлормен қолғап түйістірді. Осы кездесуде қолына был­ғары қолғап кигелі бері алғаш рет әлем чемпионатына қаты­сып жат­қан біздің боксшы қар­сыла­сын айқын басымдықпен жеңіп, келесі айналымға жолдама алды. Бұ­ған дейін жасөс­пі­рім­дер арасын­да әлем чемпио­ны, жастар ара­сын­дағы әлем біріншілігінің кү­міс жүлдегері, былтырғы жылғы жазғы Азия ойын­дарының жеңім­пазы атан­ған астаналық бокс­шы­ға ұлт­тық құраманың бас бапкері Мырзағали Айтжанов бекер сенім артпапты. Кездесуде ол өзін ер­кін сезініп, бірінші раундтан бас­тап-ақ соққылар жасауға көшті. Шотландиялық та осал бокс­шы емес екен, біздің боксшы­ның шабуылына жауап қайтару­ға ұм­тылып отырды. Бірақ екінші раундта Елеусінов қарсы­ла­сын нок­даунға жіберді. Алайда, Тэйлор есін тез жинады. Осы кезде ұлттық құраманың бапкері Мырзағали Айтжанов пен өзі­нің жеке бапкері және әкесі Марат Елеусіновтің шар­шы алаң­ның сыртынан Данияр­ға кеңестерін беріп, қамшылап жат­қанын да көзіміз шалды. Бапкер­лерінің айт­қан сол ақыл-кеңесімен боксшы да алға ұмтылуын жалғас­тырып, қарсыласына бірнеше әдемі соқ­қы­лар жасап үлгерді. Қазақ бокс­шы­сының қаһарына іліккен Тэй­­лор кездесудегі есепті теңес­тіру­ге тырысқанымен, онысынан ештеңе шықпады. Ал үшінші раунд таза тәуел­сіздіктің төл құрдасының басым­дығымен өтті десе болады. Сөй­тіп, кездесудің соңында осындай так­тиканы ұстанған боксшымыз шот­ландиялық қарсыласын 11 : 5 есебімен айқын жеңді. Біздің боксшының салмағында кубалық Рониел Солотонго, ағыл­шын Томас Сталкер, әзербайжан Гайбатулла Гаджалиев, мажар Гуила Кате, моңғол Мункх Ердене Уранчимес бар. Дегенмен, бокс­шы­ның әкесі және бапкері Марат Елеусіновтің айтқанындай, әр ай­қасқа дұрыс тактика ұстанып шы­ғатын қазақстандықтың биылғы әлем чемпионатынан дәмесі зор. Соңғы кездері елішілік жарыс­тар­да қарсыластарын шыдатпай жүрген боксшымыз былтырғы Азия ойындарында алтын тұ­ғыр­дан қол бұлғап, өзін жақсы қырынан көрсеткен болатын. Жалпы, осы жолғы әлем чем­пионатында Олимпия ойын­дары­ның 92 жолдамасы сарапқа салы­ну­да. Бұл сында Лондонға жолдама алу үшін боксшылар 49 кило, 91 кило және +91 кило салмақ дәрежелері бойынша үздік алты боксшының қатары­нан көрінуге тиіс. Ал өзге сал­мақ­тарда ширек финалға шықса да жеткілікті. Бүгін Баку рингіне 60 кило салмақта Ғани Жайлауов пен 75 килодағы Данабек Сужанов шығады. Екеуі де Қазақстанның бір емес, бірнеше дүркін чем­пио­ны. Жайлауов Жамбыл об­лы­сының өкілі. Команда сапын­дағы тәжірибелі боксшылардың бірі. Ол студенттер арасындағы әлем чемпионаты мен Азия чемпио­натында жеңіс тұғырына көтеріл­ген. 2009 жылы Миланда өткен әлем чемпионатына да қатысты. Бірақ, сол кезде оның жолы бол­мады. Қазақ­стан­дық­тың биылғы чемпионаттағы ал­ғашқы қарсы­ла­сы – жапон Шота Накаяма. Данабек Сужанов ересектер арасындағы әлемдік додада ринг­ке алғаш рет шыққалы отыр. Оның қарсыласы – тайпейлік Янг Ю Тинг. Осы бәсе­кеге Өске­мен­нен Данабектің әкесі Жұмағұл Сужанов та келіпті. Баласына жанкүйер болу үшін ғой. Әкесі­мен күн сайын кездесеміз. «Жеңе ме? Жолдама ала ма?» деп сұраймыз. Өзі де кезінде төрт жыл бокспен айналысқан Жүкең: «Әзірше ештеңе айтпаймын. Бәрін ринг көрсетеді», дейді тура жауаптан қашқақтап... Дастан КЕНЖАЛИН, «Егемен Қазақстан» – Бакуден.