Асхат РАЙҚҰЛ,
«Егемен Қазақстан»
«Монумент толық күрделі жөндеуден өтті. Әрлеп, безендіру жұмыстарына қазақстандық жас дизайнерлерді тарттық. Көпшіліктің күш салуының арқасында бүгінгі жетістікке жетіп отырмыз. Астана қаласы әкімінің қатысуымен бірнеше рет кеңес жиындар өтті. Барлық мәселелерге жіті қарауға тырыстық», дейді «Астана-Бәйтерек» ЖШС директоры Мұрат Сапарғалиев.
Жөндеу жұмыстары барысында мәрмәр плиткалар мен сатылар ауыстырылған, нысанның металл құрылғылары коррозияға қарсы жабынмен өңделіп, боялған. Санитарлық тораптардың жабдықтары мен витраждар жаңасына ауыстырылыпты. Жаңартылған дизайн бойынша мұнараның ішкі жағын әрлеу жұмыстары көпқырлы стильде жүргізілді. Тағы бір жаңалық – бөлек LED-экраны бар заманауи өнер галереясы ашылған. Сонымен қатар, монументтің фойесіне габаритті иілгіш LED-экран қойылыпты. «Бәйтеректің» төбесіндегі көкте самғап жүрген Самұрық құс түріндегі жаңа аспалы шам да келушілерді бейжай қалдырмасы анық.
М.Сапарғалиевтің айтуынша, негізгі шаруа Астана қаласы әкімдігі тартқан демеушілердің көмегімен біткен. Қазіргі таңда мұнда елуге жуық қызметкер жұмыс істейді. «Бәйтеректі» өткен жылы 500 мыңнан астам адам тамашалаған екен.
Астана әкімдігі ЭКСПО-2017 көрмесі кезінде келушілермен жұмыс жасау үшін еріктілерді тартпақ. Келушілерге қолайлы жағдай жасау мақсатында билет сатылатын терминалдар орнатылған. Дегенмен, жөндеу жұмыстарынан кейін билет бағасы қымбаттағаны байқалады. Бұрын үлкен кісілер үшін – 500 теңге, балалар үшін 250 теңге болса, қазіргі уақытта үлкендерге – 700, балаларға 300 теңге көлемінде. Айтпақшы, халықтың жекелеген топтарына жеңілдіктер қарастырылған.
