Әлеуеті зор әскери бөлім

Комитеттің көшпелі оты­ры­­сында депутаттар әс­кери бө­­лімінің ма­тери­ал­дық-тех­ни­калық қам­тамасыз еті­луі­мен, әскери қыз­мет­ші­лер­дің тұрмысы мен қару-жа­рақ жабдығы және байланыс құралдары көрмесімен, сондай-ақ, Жедел мақсаттағы бригада және «Бүркіт», арнайы мақсаттағы отряды жеке құра­мы­ның жабдықталуын көзбен кө­ріп, жалпы жағдайдың мән-жай­ынан хабардар болды. Сонымен қатар, сенаторлар оқу қалашығындағы әскери қыз­метшілер ұйымдастырған көр­сетілім сабақтарын да тамашалады.
Кездесу аясында Ұлттық ұлан басшылығының қа­ты­суы­мен «Қазақстан Рес­пуб­ли­касы Ұлттық ұланы туралы» Заңның іске асырылуы жайындағы сұрақтар бойынша дөңгелек үстел өтіп, онда аталған тақырып шеңберінде Ұлт­тық ұлан бас қолбасшысы, генерал-лейтенант Руслан Жақсылықов арнайы баяндама жасады. 
Бүгінде қалашықтың жалпы аумағы 20 гектар жерді алып жатқан әскери кешеннің негізгі ғимараттар кешені 31 115 шаршы метрді құрайды. Оның ішінде штаб ғимараты мен үш жауынгерлік казарма, екі асхана, техникалық қызмет көрсету орындарымен жабдықталған автомобиль паркі, әскерилердің дене- шынықтыруына арналған құрылғылармен қатар, екі қабатты спорт кешені және заманауи үлгіде жабдықталған мультимедиялық ату тирі бар. 
«Елбасымыздың арнайы тап­сырмасы негізінде құ­рыл­ған Ұлттық ұланның бас­ты мақсаты – Астана қала­сы­ның қоғамдық қауіпсіздігін қам­­тамасыз ету. Бұл жерде әскерилерге қажет­ті жағ­дай­лардың бар­лығы  жа­сал­­ған. Ал енді осы күндері елорда­мыз­да ЭКСПО көрмесінің өт­кізілуіне байланысты біз­дің бөлімге еліміздің төрт өңі­рі­нен қосымша әскерилер қыз­метке шақырылды. Оларға да тиісті деңгейде жағдай жа­салып, қоғам қауіпсіздігі қы­ра­ғылықпен қадағалануда деп нық сеніммен айта аламын», деді Ұлттық ұлан бас қол­басшысының орынбасары Мұхаметқали Сатов.
Мұнда оң шешімін тапқан ең маңызды мәселенің бірі – әскери қалашықта офицерлер мен келісімшарт негі­зін­де қызмет ететін әске­ри­лер және олардың отбасылары үшін 104 пәтерлі тұрғын үй тұрғызылғаны болса керек. Аула ішінде асыр салып жүрген балақайлардың бір­не­шеу­інің маңдайынан сүйіп, бата­сын берген Сенат депутаты Мұхтар Алтынбаев: 
«Тәуелсіздік жылдарында әскери саладағы мамандардың әлеуметтік жағдайын жақсарту Мемлекет басшысының ба­сым бағыттарының бірі бол­ды. Мемлекеттің ұдайы кө­ңіл бөлуінің нәтижесінде біз­де Ұлттық ұлан мен оның қыз­метін реттейтін арнайы заң да қабылданды. Бүгін осы заң та­лаптарының орындалуын қа­дағалау мақсатымен осы бө­лімге келіп тұрмыз. Бұл жер­дегі жағдайды өте жоғары бағалаймын. Әрине, өмір болған соң түрлі жағдайлар орын алып, бірқатар мәселелер туындап жатады. Оның бәрін де осындай көшпелі отырыс­тар аясында тиісті деңгейде шешетін боламыз», деді сенатор.
Жалпы, Астана іргесіндегі Үркер шағын ауда­нын­да орналасқан әскери бө­лімнің бүгінгі келбеті барын­­ша заманау­и талапқа сай бейімделген. Се­бебі, мұн­да тұрғындар үшін стади­он мен спорттық жә­не оқу ғи­мараттары, жа­ңа меди­ци­на­лық құрал-жаб­дықтармен то­лық қам­тамасыз етіліп, 60 жа­тын және күнделікті амбу­ла­­ториялық ем алу үшін 100 орындық лазарет салынған. 

Нұрлыбек ДОСЫБАЙ,
«Егемен Қазақстан»