«Нұр Отан» партиясы арқылы тұрғындарға МӘМС жүйесін енгізу бойынша түсіндіру жұмыстарын өткізу, халықтың құқықтық, ақпараттық сауаттылығын арттыру, сондай-ақ, әлеуметтік қарама-қайшылықтарды шешу, оның алдын алу мақсатында ұйымдастырылған шарада Мәжіліс депутаты Зәуреш Аманжолова, Денсаулық сақтау вице-министрі Ләззат Ақтаева, Еңбек және халықты әлеуметтік қорғау министрлігінің, «Атамекен» ұлттық кәсіпкерлер палатасының өкілдері бас қосты. Алқалы мәжіліс бейнеконференция пішімінде өтті. Оған еліміздің 16 өңірін есепке алғанда 200-ден астам адам қатысты.
Кездесу барысында әлеуметтік медициналық сақтандыру қоры жарнасын төлеуден азаматтардың 15 санаты, яғни халықтың әлеуметтік аз қамтылған тобы босатылатыны айтылды. Олардың қатарына балалар, бұрын «Батыр Ана» атағын алғандар, «Алтын алқа», «Күміс алқа» иегерлері, сондай-ақ I және II дәрежелі «Аналық даңқ» орденімен марапатталған көп балалы аналар, Ұлы Отан соғысы ардагерлері мен мүгедектері, мүгедектер және басқа да санаттағы жандар кіреді.
– Жоспар бойынша бұл бағдарламамен ең бірінші медицина саласының қызметкерлерін, екіншіден, жұмыс беруші тұлғалардың негізгі міндеттерін жан-жақты түсіндіруден бастадық. Әрбір адам ХҚО-ға барып, қай статусқа жататынын білгені жөн. Әлеуметтік жағдайы бойынша, жұмыссыз болса, тіркеліп, арнайы құжат алуды тиіс, – деді Мәжіліс депутаты Зәуреш Аманжолова.
Бүгінде әрбір қазақстандық 2018 жылдың 1 қаңтарына дейін әлеуметтік медициналық сақтандыру жүйесіндегі өз мәртебесін белгілеп алуы керек. Сол кезде қиындыққа тап болған жағдайда кімнің көмегіне бірінші жүгіне алатындығы белгілі болады.
– Осы жылдың 1 шілдесінен бастап медициналық сақтандыру жүйесі іске қосылатыны, оның қыр-сыры жайлы бұқара халықтың басым бөлігі хабарсыз екені белгілі болды. Осыған байланысты «Нұр Отан» партиясының бастамасымен халыққа түсіндіру бойынша 45 мыңнан астам жиын өткіздік. Оған 3 миллионнан астам халық қатысты. Сонымен қатар, арнайы кітапшалар да шығардық, – деді Республикалық қоғамдық қабылдау бөлмесінің меңгерушісі Жұмажан Жүкенов.
