Мерекелерімен құттықтады

Мемлекет басшысы Нұрсұлтан Назарбаев Қазақстан Республикасының ұстаздарына, білім беру саласының қызметкерлері мен ардагерлері атына құттықтау жолдады, деп хабарлады Қазақстан Республикасы Президентінің баспасөз қызметі. «Сіздерді төл мерекелеріңіз – Мұғалім­дер күнімен құттықтаймын! Шәкірттерін білім нәрімен сусындатып, жақсы қасиеттерді бойына дарытатын ұстазға деген халқымыздың құрметі қашан­да ерекше. Өйткені, қоғамның басты бай­лы­ғы – адам болса, сол «адамның адамшылығы жақсы ұстаздан» дейді дана Абай. Қазіргі заманда білім деңгейі жоғары ұлт қана жаһандану талаптарына жауап бере алады. Сондықтан білім саласы – елдің ертеңін айқындайтын, оның бәсекелестік қабілетіне ықпал ететін аса маңызды сала. Биыл еліміз өз Тәуелсіздігінің 20 жыл­ды­ғын атап өтеді. Біз осы жылдарда заман талабына сай білім берудің жаңа жүйесін құрдық. Бүгінде мемлекетіміз халыққа әлем­дік стандарттарға сай білім беру үшін өз тарапынан барлық жағдайларды жасауда. Ұстаз мәртебесін көтеру және оның ерен ең­бегін лайықты түрде бағалау орайында ауқым­ды әрі жүйелі шаралар іске асы­ры­луда. Мектепке дейінгі, орта, кәсіптік және жоғары білім беруде мүлде жаңа бағыттар анықталып, электронды оқыту жүйесі енгізілуде. Білім жүйесінің жаны да, жүрегі де, тірегі де – ұстаз. Сондықтан еліміздің ертеңгі келешегі сіздердің қолдарыңызда. Еліміздің атын әлемге танытатын білімді де талантты шәкірттеріңіз көбейе берсін! Сіздерге зор денсаулық, ұзақ өмір, қиын да қастерлі ұстаздық қызметте табыс тілеймін!», делінген жеделхатта.