Мектеп киімі әр шәкіртке жарасады

Ақтөбе облысында білім басқармасы оқушылардың барлығына бірдей мектеп формасын киюді міндеттеп отыр. Бұл жөнінде қойылатын талап­­­ты күшейте түсу туралы мектеп басшыларына тапсырма берілген. Соған байланысты, кейбір мектептердің жарғыларына өзгерістер енгізіліпті. Ережеге сәйкес, енді оқушылар ғана емес, мұғалімдер де біркелкі киім киюі тиіс. Сонымен қатар колледж оқушылары да білім беру мекемелерінің ішкі тәртіп ережелеріне сай киінуге көшіп жатыр. Қазір колледж бен мектепке хиджаб киіп келетін оқушылардың саны күрт кеміген. Біз осы және мектеп формасына қатысты қолға алынып жатқан басқа да шаралар туралы облыстық білім басқармасының бастығы Айгүл АРЫНҒАЗИЕВАМЕН тілдескен едік. – Оқушыларға мектеп формасын киюді міндеттеу, олардың хиджаб киюлеріне тый­­ым салу емес. Осыны ата-аналар дұрыс түсінгені жөн. Жас­­тардың имандылыққа бет бұрғандары, әрине, дұ­рыс. Бірақ мектеп – мешіт емес, білім шаңырағы. Сондықтан, оқушы мектепте ішкі тәртіпке ба­ғынуы тиіс. Бүгін «мұсылманбыз» деп кейбір қыз балалар хиджаб кисе, ал ертең өзге діндегілер өз сенімдері бойынша киініп келулері мүм­­­кін. Сонда мектеп әр түрлі діндердің орта­­­лығына айнала ма? Міне, сондықтан, мек­­тептің жарғысымен бекітілген ережелерді оқушы да, мұғалім де, ата-ана да орындауға міндетті, – дейді Айгүл Аман­ға­зы­қызы. Ол мұндай талаптың мұғалімдерге де қо­йылып отырғандығын айтады. Олар да біркелкі киінеді екен. Сондай-ақ бұл талап колледж оқу­шыларына да қойылып отырған көрінеді. Облыс мектептерінде діни ахуалды жақ­сар­ту жөнінде жаңа оқу жылына жұмыс жос­пары жаса­­лыпты. Соған байланысты бірқа­тар іс-шаралар ұйымдастырылған болса, со­ның бір парасы – ата-аналар жина­лы­с­тары. Онда «Отбасындағы рухани ізгілендіру тәр­биесі», «Зиянды заттардан ертең емес, бүгін құтылған жөн» тақырыптарында баяндамалар тыңдалған. Сондай-ақ, мектептерде «Дін және мектеп», «Діни фанатизм» тақыры­бын­да дөң­гелек үстел, «Діннің адам­ға ықпалы» тақы­рыб­ында тәрбие сағаттары өткізілуде. Сонымен қатар, об­лыс­тағы бар­лық мектептер мен колледждерде дәс­түрлі емес діни ағ­ым­дардың арты неге соқты­ра­тынын жас­тар­ға түсіндіру мақсатында «Адасқан­дар» де­рек­ті фильмі көрсетіліп жатыр екен. Фильм­де «Терроризм» бабы бойынша істі бол­ған ақтө­белік Еркін Досқалиев туралы баяндал­ған. Гүлжан БАЗЫЛҚЫЗЫ. Ақтөбе.