Мың алғыс саған, мұғалім!

«Адамның бір қызығы бала деген» дейді Абай атамыз. Ұлт тәрбие­сінің бастауы бала тәрбиесінде жатқаны бесенеден белгілі. Бүгінгі бала – ертеңгі мемлекеттің тізгінұстар азаматы. Сондықтан бала тәр­биесіне бүкіл қоғам жауапты. Әсіресе, баланы тәрбиелейтін, білім нәрімен сусындататын, азамат ретінде қалып­тас­ты­ратын мектеп­тің орны бір бөлек. Қызылорда қаласындағы №3 мектеп-лицей солардың қатарында. Мектеп-ли­цей­дің қабыр­ға­сы сонау 1939 жылы қаланған. Бү­гінде 70 жыл­дан астам тарихы бар мектептен талай білікті азамат түлеп ұшқан. Атал­ған білім ордасы шәкірт тәрбиесіне, біліміне жіті назар аударады. Өткен оқу жы­лы мектепті 119 оқушы бітіріпті. Сол оқу­шы­лар­дың 81-і мемлекеттік грант иегері атанып, жоғары оқу орындарына түсті. «Алтын белгіге» ұсынылған 8 оқушының барлығы үмітті ақтады. Сонымен бірге 5 шәкірт үздік аттестатқа ие болды. Мектеп мұндай жетістікке бала тәр­биесі үшін ты­ным көр­мейтін, әрбір оқушы­ның санасын оятып, бі­лімге деген құштар­лығын артты­ра­тын мұ­ғалім­дердің мұқалмас қайрат-жі­герінің арқасында жетіп отыр. Ал ұжымды ұйыс­тырып, жұмысын жү­йе­леп отыр­ған мектеп директоры Гүлжан Ай­да­рованың ең­бегін осы орайда айтпай кетуге бол­май­ды. Со­нымен қатар Меруерт Әбді­халықова секілді жекелеген ұстаздар мектеп мерейі үшін аянбай тер төгіп келеді. №3 мектеп-лицейінде өзімнің екі балам білім алып жатыр. Қызым Нәзира 11-сы­нып­та оқиды. Жақсы оқиды. Ол мұғалім­дер мен мектептің үмі­тін ақтайды деген сенімдемін. Ал ұлым Нариман 8 сынып оқушысы. Мектептегі үздік шәкірттің бірі. Бала­ла­ры­мызға білім беріп, оларды қанат­тан­дырып отырған мектеп-лицей ұстаз­да­ры­на айтар алғысымыз шексіз. Гүлмира БЕЙСЕНБАЕВА. Қызылорда облысы.