Қазақстан Қарулы Күштерінің және ҰҚШҰ-ға қатысушы мемлекеттердің офицерлер корпусы қатарын 100-ден аса магистрант толықтырды. Қазіргі уақытта Ұлттық қорғаныс университеті ҰҚШҰ-ға мүше мемлекеттердің қарулы күштері үшін әскери кадрларды бірлесіп даярлау жөнінде оқу орындарының тізбесіне енгізілді және бүгінде түлектер арасында Армения, Қырғызстан және Тәжікстан республикаларының өкілдері бар.
«Әскери кадрларды даярлау ерекше мемлекеттік маңызды іс болып табылады. Сондықтан сіздер, яғни, Ұлттық қорғаныс университетінің түлектері заман талабына сай және көшбасшылық қасиеттерге ие болып, әскери қызметтің барлық салаларында бағыт-бағдарларыңыз бар үздік маман атануға тиіссіздер. Университет қабырғасында әртүрлі ауқымдағы операцияларды сәтті жоспарлауға, бірлестіктерді, құрамалар мен әскери бөлімдерді мықты басқаруға мүмкіндік беретін терең білім алдыңыздар», – деді генерал-полковник С.Жасұзақов.
Қазіргі уақытта Ұлттық қорғаныс университеті Қазақстанның әскери білім беру ісінде көшбасшы саналады. Онда тыңдаушылар мен оқытушылардың ұтқырлығына, жоғары және жоғары оқу орнынан кейінгі барлық деңгейлер мен дәрежелер сабақтастығын қамтамасыз етуге маңыз беріледі. Сондай-ақ, білім бағдарламаларын жүзеге асыруда озық оқыту әдістері қолданылады.
«Егемен-ақпарат»
