Бұл мерекенің жөні бөлек

Өткен аптаның соңында Курчатов қаласында, нақтылап айтсақ, осындағы Ұлттық ядролық орталықта Атом саласы қызметкерлерінің күні жылдағыдан да ерекше жағдайда аталып өтілді. Ал оның себебі жоқ емес еді. Биылғы жылы Елбасы Жарлығымен Семей атом поли­гоны­ның жабылғанына 20 жыл толып отыр. Міне, содан беріде тек Ұлттық ядро­лық орталық қана емес, Курчатов қаласы тұтасымен бейбіт мақсатта жұмыс істеуде. Мұны бір десек, екіншіден, өздерінің кәсіби мерекесі қарсаңында аталған орталықтың бас ғимараты сәулетті жаңа қонысқа жайғасты. Онда атом саласы қызметкерлерінің алаңсыз жұмыс істеуіне мейлінше қолайлы мүмкіндік жа­салған. Оның сыртында жаңа ғ­и­мараттағы акт және спорт залдары да бүгінгі күн тала­бына сай толық жаб­дықталған. Мерекелік жиынды орталықтың бас директоры, академик, Мемлекеттік сый­лық­тың лауреаты Қайрат Кәдіржанов аша отырып, тәуелсіздіктің 20 жылында атқарылған жұмыстарға қысқаша тоқталып өтті. Одан кейінгі жерде атом саласының үздік қызметкерлері сала­лық министрлік, облыстық және қала­лық әкімдіктің тиісінше марапаттарын иеленді. Мұндағы ғалымдар корпусын кәсіби мерекелерімен сондай-ақ ядро­лық сынақтарға қарсы «Невада-Семей» халықаралық қозғалысының вице-президенті Сұлтан Картоев, Қазақстан Ұлттық жаратылыстану ғылымдары академиясы Семей өңіріндегі филиа­лы­ның төрағасы, профессор Серікбай Маусымбаев және тағы басқалар қызу құттықтады. Жиын соңында орталық жариялаған журналистер конкурсының қорытын­дысы бойынша жеңімпаз атанған әріп­тес­теріміз марапатталды. Бұдан кейін баспасөз мәслихаты өткізілді. Дәулет СЕЙСЕНҰЛЫ, Семей.