Шараның ашылу рәсіміне Олимпиада чемпионы, Парламент Мәжілісінің депутаты Серік Сәпиев, Қазақстанның еңбек сіңірген әртісі Майра Мұхамедқызы, Қазақстанның Тұңғыш Президенті қорының лауреаты, белгілі балет бишісі Досжан Табылды және мемлекеттік органдардың өкілдері, мәдениет пен спорт қайраткерлері, елордамыздың тұрғындары мен меймандары қатысты.
Әйгілі опера әншiсi Майра Мұхамедқызы Астананың туған күні ерекше қуанышқа бөлейтін мейрамдарының бірі екенін атап көрсетті. «Астана бүгінгі таңда бүкіл әлем көз тігіп отырған ғажайып қалалардың қатарынан орын алды. Біз осы елордамызбен бірге өсіп келе жатқанымызға қуаныштымыз. Бұл қаладағы әрбір ғимараттың өзіндік сыры бар. Елордамыздың әрі қарай дамып, өркендеуіне тілектеспін», деді М.Мұхамедқызы.
Ұйымдастырушылардың айтуынша, онкүндік аясында көптеген бұқаралық, мәдени-танымдық шаралар жоспарланған. «Кітапханаға келушілер үшін «Елбасы және Астана» тақырыбында бірегей әрі кешенді көрме ұйымдастырылған. Онда көпшіліктің назарына 60 басылым, 47 архив материалдары, музей жинағынан 30 жәдігер ұсынылады. Көрме негізгі 3 бөлімнен тұрады: Олар «Астананың қалыптасуы», «Астананың қайталанбас бейнесі» және «Астана – әлемдік үнқатысу алаңы» деп аталады.
Мерекелік онкүндік аясында өзіндік көзқарасы бар әуесқой фотосуретшілер де анықталып, «Мәңгілік Ел» салтанат қақпасы – қазақстандықтардың көзімен» тақырыбындағы фотобайқаудың жеңімпаздары марапатталады.
Сонымен қатар, білімін сынауға ниет білдіргендер үшін «iDos» гид-роботы зияткерлік викторина өткізіп, дұрыс жауап бергендерге сертификат табысталады. Бұдан бөлек 5 шілде күні кітапхана қабырғасында Кино күндері өтетінін айта кеткен жөн. Оның барысында «Елбасы жолы» киноэпопеясының фильмдері көрсетіледі.
Онкүндік шілденің 1-нен 10-на дейін жалғасады. Оның аясында тақырыптық және шолу экскурсиялары өткізіледі.
Рауан ҚАЙДАР,
«Егемен Қазақстан»
