«Бұл маңызды тәжірибеміздің арқасында біз ЭКСПО-2017 көрмесіне қатысып отырмыз және біздің мақсатымыз – заманауи технологиялардың энергиямен қалай үйлесе алатынын көрсету. Біз жаңғырмалы қуат көздерін дамытумен қатар, жоғары технологиялық және инновациялық құралдардың көмегімен қуат үнемдеу мәселесіне де назар аударамыз.
Қазіргі таңда қалдықтарды болдырмау үшін жобалау тиімділігіне көп көңіл бөлудеміз. Осы технологияларды Қазақстанда әрі қарай дамыта алатын инвесторларды, дистрибьюторлар мен серіктестерді тапсақ деген ниетіміз бар», дейді Энергетика және сандық инфрақұрылым бюросының жетекшісі Кармела Ларадеста. Оның айтуынша, бүгінде Апулия өңірінде өндірілетін қуаттың 30 пайызға жуығы жаңартылатын қуат көздерінен алынады. Бұған қоса, өңір өзі тұтынатын энергиядан екі есе артық қуат өндіреді. Енді қуат өндіру көлемін ұлғайтудан гөрі, оны үнемдеуге басымдық берілуде.
«Патенттелген жобалардың әрқайсысы өзінің инновациялығымен ғана емес, коммерциялық және өнеркәсіптік мәселелерді шешуге бағытталғандығымен ерекшеленедi. Мәселен, қалдықтан түзілген биомассаны өңдеу және қайталап пайдалану технологиясы электр қуатын өндіруге және кейін жойылуға тиіс қалдықтардың мөлшерін азайтуға мүмкіндік береді, ашық булы қабылдағыш технологиясы күннен қуатталатын электр стансаларының тиімділігін арттырады, оттегінің жалынсыз жануы төменгі сұрыпты отыннан арзан қуат өндіреді, көмірсутекті талшықты пайдалану қоғамдық орындарды жарықтандыруға жұмсалатын қуат шығындарының мөлшерін қысқартады», дейдi К.Ларадеста.
Асқар Жұбатжанов,
«Жасыл экономика коалициясының»
инженерi:
– Бiз жасыл экология аясында сутегi генераторын жасаудамыз. Осы жұмысқа Қазақстан-Британ университетiнiң зертханасы да қосылды. Себебi, сутегi – болашақтың энергиясы. Бiз жасап жатқан сутегi генераторын түрлi қуаттағы автокөлiктерге, автобустарға орнатуға болады. Мұндай генератор қозғалтқыш күшiне байланысты отынды шамамен 25-45 пайызға үнемдейдi. Сондай-ақ, ол экологияны таза ұстауға септiгiн тигiзедi. Ауаға бөлiнетiн зиянды қалдықтар шамамен 2 есеге азаяды, көмiртегi қышқылы мүлдем бөлiнбейдi. Сутегiнi пайдаланған автокөлiктiң отыны толық жанып кетедi, күйе қалмайды, қозғалтқыштың жұмысына жақсы әсер етедi. Еуропаның бiрнеше елiнде, Жапония мен Оңтүстiк Кореяда осындай автокөл iктердiң гибрид нұсқалары мен таза сутегi қозғалтқыштары пайдаланылады. Таза сутегi қозғалтқыштарының шығыны көп. Ал бiздiң аз сутегiнi пайдалану ұсынысымыз технопарк шеңберiнде әзiрленсе, үш жыл iшiнде өнеркәсiп деңгейiне жеткiзудi көздеп отырмыз.
Расында Италия ғалымдары ұсынған жобалардың болашағы зор. Бiзге сутегi күйiндегi энергияны дамыту үшiн олардың технологияларымен танысу қызықты болды.
