Басқосудың ресми бөлімінде еліміздің Инвестициялар және даму министрі Жеңіс Қасымбек Германия өкілдерін ұлттық күнімен құттықтап, жылы лебізін жеткізді. Содан кейін ЭКСПО көрмесінің осы күнінің басты қонағы Германия президенті Франк-Вальтер Штайнмайер сөз сөйледі. Ол халықаралық шара ғимараттарының футуристік бағытта салынғанын айтып, бұл Қазақстанның болашаққа деген жоғары ұмтылысын білдіретінін әңгімеледі. Сондай-ақ, Германия көрме барысында «жасыл» технологиялар саласындағы тәжірибесімен бөлісетінін атап өтті. «Елімізде бүкіл электр энергия көлемінің үштен бірі жаңғыртылатын қуат көздерінен өндіріледі. Біздің технологиялық тәжірибеміз мол. Бұл біздің жетістігіміз және оны ЭКСПО көрмесінде баршаға көрсеткіміз келеді», деді Франк-Вальтер Штайнмайер.
Мәртебелі мейман Қазақстандағы маңызы жоғары көрменің қонақтары саны көп болуын және олардың шараға көңілі толуын тілеп, ыстық ықыласын білдірді. «ЭКСПО пікірталас пен идеялар ортасына, үздік шешімдердің бәсеке алаңына, келісімдер жасалатын қалашыққа айналатынына сенемін. Біз Қазақстанмен ортақ мақсаттарды бөлісіп отырмыз, енді сіздердің жетістіктеріңізбен де бөліскіміз келеді. Елдеріміздің болашағы зор болып, тұрақты энергетикаға жетейік», деді Германия президенті.
Жиын Германия павильонында неміс бейне әрі медиа суретшісі Макс Хаттлердің туындылары қойылған көрмемен жалғасты. Олар төл мерекелерін 16 шілдеге дейін атап өтпек.
Неміс халқы көрмеде екі және төрт дөңгелекті электр көліктері мен қуат өндіре алатын «ақылды үйлер» секілді бірнеше жоба ұсынған.
