Жиында жасалған келісім өңірге 1 млрд АҚШ долларына дейін инвестиция тартуды қарастырады. Меморандумға сәйкес, еліміздің оңтүстік-батыс аймағындағы мұнай-газ, электро-энергетика, ауызсумен қамтамасыз ету және туризм сияқты салалары дамытылмақ. Ал облыс әкімдігі тарапынан малайзиялық компанияға қол қойылған құжаттағы мақсаттарға жетуге қолдау жасалып, инвестицияларды қорғау мәселесінде жәрдем беріледі.
Жиында Малайзияның халықаралық сауда және индустрия министрінің орынбасары Датук Ахмад Хаджи Маслан сөз сөйлеп, келісімнің мән-маңызын әңгімеледі. «Бүгінгі келісім – екі ел халқының әлеуметтік-экономикалық даму жолындағы тағы бір маңызды кезең. Астанадағы көрмеге Малайзия үкіметінің 90-нан астам мүшесі мен жеке бизнес өкілдерінің қатысатындығын ескерсек, алдағы уақытта екі елдің компаниялары арасында өзара түсіністік туралы бірнеше меморандумға қол қойылып, келісімшарттар жасалады деп ойлаймыз.
Қазіргі таңда Маңғыстауда мұнай мен газ өңдейтін 54 ұңғыма бар. Малайзиялық «Rich Energy» компаниясы осы өңірге шетелдерден инвестиция тартып, 2020 жылға қарай ұңғымалардың санын 88-ге жеткізуді көздейді. Сонымен қатар, компания метанол шығару зауыты мен электростанса құрылысын және табиғи газды сұйылту құрылғыларын орнатуды жоспарлап отыр», деді ол.
Былтыр екі мемлекет арасындағы сауда-саттық көлемі шамамен 50 млн АҚШ долларына жуықтаған. Бұл 2015 жылғы көрсеткішпен салыстырғанда, 36 пайызға артық. Ал Малайзияның Қазақстанға тауар экспорттау көлемі 4 млн АҚШ долларын құрады. Осылайша, Малайзия тауар айналымы жағынан ТМД аймағында төртінші әріптесіміз болып отыр.
