Көшпелі мұражай «Сарыарқаның көне жолдары», «Ескерткіштер – тарихтың үнсіз куәгерлері», «Уақыт үндестігі» сынды тақырыптар арқылы көзі қарақты көрермендерді тарихтың терең қойнауына сапарлатпақ. – Біздің мұражайда бүгінгі күні 50 мыңнан астам жәдігер бар. Олардың ішінде сирек кездесетін дүниелер де табылады. Бұл көрмеге біз 70 жәдігер алып келдік. Олардың барлығы – түпнұсқа. Биылғы жылы өткен «Тарихта өз атыңды қалдыр» атты акция шеңберінде Тайжан Қалмағамбетовтің ұрпақтары біздің мұражайға оның сырнайын қалдырған еді. Оны да осында алып келдік, – дейді Жезқазған тарихи-археологиялық мұражайының директоры Раушан Қаппарова. Көрмеге келушілер былғарыдан, қазақ халқының ағаш пен металдан жасалған ыдыстарын, қымыз сақтауға арналған құмыра, бие сүтін құятын былғары мес, кеселерге арналған құтылар, ерлердің белдіктері, әйелдердің әшекейлерін көре алады.
Мирас АСАН,
«Егемен Қазақстан»
Қарағанды облысы,
Жезқазған қаласы