А.Қыдырбаева баспасөз мәслихатында Ұлт жоспары шеңберінде көзделген сот реформаларының сәтті іске асырылғанын атап өтті. Атап айтқанда, ол Ұлт жоспары шеңберінде жүргізілген реформалардың сот төрелігін жүзеге асырудың тиімділігіне оң ықпал еткенін жеткізді.
«Айталық, есепті кезеңде соттарда азаматтық істерді қарау мерзімі екі есеге қысқарды. Істердің 62,5 пайызы жеңілдетілген іс жүргізу тәртібінде қаралуда. Сот бұйрығы, дауларды шешудің баламалы тәсілдері және медиация тәртібінде қаралған істер саны едәуір артты. Келісімдік тәртіптегі қылмыстық істер саны 43 пайызға, қысқартылған негіздегі істер саны 3,5 есеге көбейді», деді Жоғарғы Соттың мамандандырылған сот алқасының төрайымы.
Сонымен қатар ол судьялыққа кандидаттардың жасы 30-ға дейін ұлғайтылғанын жеткізді.
Өз баяндамасы барысында спикер Жоғарғы Сот жанындағы Сот төрелігі академиясының алғашқы түлектері қанат қаққанын да сөз етті.
«Жоғарғы Сот жанындағы айрықша мәртебеге ие Сот төрелігі академиясы 2016 жылғы 18 ақпанда Президент Жарлығына сәйкес құрылды. Жұмыс істеп жүрген судьялардың біліктілігін арттыру және қоғамның сот төрелігіне сенімін нығайтуға қабілетті жаңа формациядағы сот кадрларын даярлау жаңа ЖОО-ның негізгі міндеттері болып табылады. Биыл Сот төрелігі академиясын 51 түлек бітіріп шықты», деп атап өтті А.Қыдырбаева.
Сонымен қатар, спикер жаңа ереже бойынша 191 судья іріктелгенін, оның ішінде 140 судьяның кәсіби қызметі бағаланғанын баяндап, жалпы алғанда, судьялар корпусы өздерінің кәсіби біліктіліктерін растап келе жатқандықтарын жеткізді.
Соңында Айгүл Қыдырбаева инвестициялық даулар бойынша сот ісін жүргізудің қорытындыларына тоқталып, 2017 жылдың бірінші жартыжылдығында атқарылған жұмыстардың нәтижесіне де шолу жасады.
Рауан ҚАЙДАР,
«Егемен Қазақстан»
