2015 жылы Қазақ хандығының 550 жылдығына орай облыстағы бірден-бір республикалық маңызы бар ортағасырлық қалашық – Сарайшықтың тарихына қатысты «Сарайшық – бабалар мұрасы» атты деректер жинағы жарық көрді. «Атырау даласының тарихи-мәдени мұрасы» атты кітап-альбом басылды.
Жалпы, облыс бойынша 921 тарихи-мәдени мұра нысаны бар. Соңғы жылдары облыс аумағынан жаңадан тарихи-мәдени мұра нысандарын анықтау ісін инспекция мамандары өз күштерімен жүргізуде. Кеңестік кезеңде және одан кейінгі тәуелсіздіктің алғашқы жылдарында жергілікті мамандардың жоқтығынан облыс көлеміндегі ескерткіштерді анықтау ісі мәскеулік және алматылық зерттеушілер атқарған болатын.
Инспекция жұмысында қолға алынған келесі бір жаңа бастама ескерткіштердің тарихына қатысты деректерді іздестіру мен зерттеу бағытында жүзеге асуда. 2014-2015 жылдары Атырау өңірінің тарихы, археологиясы мен этнографиясына қатысты деректерді іздестіру және жинақтау мақсатында Ресейдің Мәскеу, Санкт-Петербург, Астрахань қалаларына археографиялық іссапарлар ұйымдастырылды. Іссапар барысында Ресейдегі ең ірі орталық архивтер мен кітапханаларының қорларында жұмыс істеуге мүмкіндік туды. Аталған ғылыми ұйымдардың қорларынан отандық тарихшылардың назарына ілікпеген Атырау мен Қазақстанның батыс өңірінің тарихы мен мәдениетіне қатысты жаңадан бірнеше құнды фото және иллюстрациялық деректерді анықтадық. Олардың ішінде қазіргі ескерткіштер тізіміндегі Ескі Гурьев қаласының, Сарайшық қалашығының, Жылы-ойдағы Қызылқала қалашығының ХІХ ғасырдағы жоспарлары, Құлшан ата мен Ақмешіттегі Бекет ата жерасты мешіттерінің сызбалары, ХІХ ғасырдың соңы мен ХХ ғасырдың бас кезіндегі Қарашүңгіл, Ұшқан ата қорымдарының және өзге де ескерткіштердің фотосуреттері бар. Сондай-ақ, мекеме биылғы жылдан бастап ескерткіштер бетіндегі ХІХ-ХХ ғасырдың бас кезінде араб әрпімен жазылған мәтіндердің аудармасынан тұратын «Атырау қазақтарының эпиграфикалық ескерткіштері» атты сериялы кітап-альбомды шығаруды жоспарға енгізді. Себебі, мазар мен құлпытас бетіндегі жазулар біздің ата-бабаларымыз туралы бірден-бір мәлімет беретін «далалық» архивтік дереккөз. Ұлы даламыздың тарихи-мәдени мұрасын зерттеу мен сақтау жұмыстарының алға қарай жалғасуына Елбасы мақаласы серпін беріп отыр.
Елбасы мақаласында аталған «Қазақстанның қасиетті рухани құндылықтары» немесе «Қазақстанның киелі жерлерінің географиясы» жобасы біздің қызығушылығымызды тудырды. Бұл жобаның бұрын-соңды қолға алынбағанын мемлекет басшысының өзі де атап айтты. Шыны керек, Атырауда да көркем, рухани, қастерлі жерлеріміздің біртұтас желісі бұрын-соңды жасалған емес. Осы тұста екшеп айтар бір жайт, Атыраудағы киелі жерлердің негізгі бөлігі облыстағы тарихи-мәдени ескерткіштерінің тізіміне енген. Мысалы,Жылыойдағы Ақмешіт, Құлшан ата, Шерліғұл, Қарашүңгіл, Ұшқан ата, Мақаттағы Оңай ата, Байбақты ата, Қызылқоғадаға Мәтен қожа және тағы басқалары. Сондықтан да, алдағы уақытта осындай киелі жерлердің тізімін анықтау мақсатында зерттеу жұмысын жүргізу жоспарланып отыр. Мұның өзі мәдени туризмді дамытумен қатар, өскелең ұрпақ жадында ұлттық сана-сезімнің одан әрі оянуына жол ашатыны ақиқат.
Мұхамбетқали КИПИЕВ,
Атырау облыстық тарихи-мәдени мұраны қорғау, қалпына келтіру және пайдалану жөніндегі мемлекеттік инспекциясының
басшысы