Қазіргі қазақ әдебиетінің даму барысын жан-жақты зерттеп-зерделеп жүрген ғалымдар Елбасы Н.Ә.Назарбаевтың рухани жаңғыруға байланысты көтерген маңызды мәселелерінің қазіргі әдебиеттегі көрінісі мен осы тақырыптың баспасөзде қалай қолдау тауып отырғандығын кеңінен талқылады. Шығармашылық иелерінің тәуелсіздік кезеңіндегі туған жер, отан, елдік мәселелерін көтерген туындылары, ел мен жер тарихынан сыр шертетін кейбір үздік шығармалары аталып, олардың көркемдік-тарихи маңызы жайлы кейінгі зерттеулер барысы туралы баяндамалар тыңдалды.
Қазіргі әдебиетіміздің дамуына үлес қосып жүрген қаламгерлер сөз алып, өз қатарластарының кейінгі жылдардағы оқырманға ұсынған көркем шығармаларының рухани құндылықтары туралы сөз етті. Осы қатардағы жазушылардың тәуелсіздік кезеңіндегі рухани өзгерістерді көркем шығармада сипаттау ерекшеліктері бүгінгі күн оқиғаларымен тығыз байланысып отыратындығы айтылды.
– Әр уақытта халқымыздың өткен уақыттағы тарихы мен салт-дәстүрінің дамып жаңғыруы оның әдебиеті мен мәдениетінің, тұрмыстағы әл-ауқатының жаңғыруына ұласады. Бүгінгі экономиканың тетігі болатын ертеңгі жас ұрпаққа лайықты көркем шығармалар ұсынып, оларға бұрынғы құндылықтарды сіңіріп отырудың Елбасы айтқан ұлт жоспарын жүзеге асыруда маңызы зор екені сөзсіз. Еліміздегі рухани жаңғырудың әдебиеттегі көрінісі тұрғысынан бүгінгі басқосу барысында біраз ой-пікірлер ортаға тасталды. Ақын-жазушыларымыз, қолына қалам ұстаған азаматтарымыз қашанда ұлт руханиятының дамуына қомақты үлес қосып, елдік пен ерлікті, татулық пен бірлікті дәріптеп мемлекет мәртебесін асқақтатып жүр деп айта аламыз, – дейді М. Әуезов мұражай-үйінің қызметкері Ермек Ханкей.
Сондай-ақ, аталған шара жазушы, ғалым Келіс Рахымжановтың 60 жылдық мерейтойына тұспа-тұс келді. «Оралу», «Қалғұты», «Қанатты жылдар», «Шилі өзен» сияқты жинақтары оқырман қауымның сүйіспеншілігіне бөленген қарымды қаламгерді әріптес тұстастары мерейлі күнімен құттықтады. Ұлт руханиятына қалтқысыз қызмет етіп жүрген жазушының ғылым жолындағы терең ізденістері жиналғандар тарапынан жоғары бағаланды.
Арман ОКТЯБРЬ,
«Егемен Қазақстан»
АЛМАТЫ
