– Мақала рухани-этностық қағидаттарға бағыттала отырып, экономиканың маңызды мәселелерін де қозғайды. Сондықтан, «Ақ жол» партиясы еліміздің экономикалық дамуын және ұлттың рухани жаңғыруының маңызды негіздерін қолдайды, – деп атап өтті Меруерт Қазбекова.
– Ал бизнес халықтың мұқтаж мәселелеріне жақын болуы керек. Сондықтан, жұмыспен қамту бағдарламаларының шағын және орта бизнеске нақты түрде қатысы бар. Яғни, шағын және орта бизнес саласына қатысты салық саясатындағы қолданыстағы тәсілдерді қайта қарау қажет. Соның бірі – жаңадан құрылатын бизнесті салықтан босату мәселесі, – дейді депутат. Ол өз сөзінде «Ақ жол» партиясы шағын және орта бизнесті дамытудың бірыңғай тұжырымдамасын қабылдау қажет деп есептейтінін де атап өтті.
Сондай-ақ, еліміздегі әйелдер бизнесі саласы да айтарлықтай табыстарға қол жеткізуде. Іскер әйелдер деген жаңаша атау пайда болды. Олар өз кәсіпорындарын дамытып, іскерліктерін көрсетуде. Ауылда да әйелдер бизнесі қолға алына бастады. Ел дамуындағы әйелдердің үлесі, әйелдер кәсіпкерлігін қолдау, бизнестегі әйелдердің экономикалық белсенділігін арттыру – аса маңызды. Өңірдегі Іскер әйелдер кеңесінде бизнестің әртүрлі салаларында қызмет ететін 20 кәсіпкер әйел бар. Өңірлік Іскер әйелдер кеңесінің мәліметінше, облыста бизнеспен айналысатын әйелдер саны 25 мыңнан асқан.
Сонымен бірге, Меруерт Қазбекова кәсіпкерлермен кездесуінде еліміздің Парламент Мәжілісінің атқаратын жалпы жұмысы туралы, «Ақ жол» ҚДП-ның парламенттік фракциясының қызметі жайлы хабардар етті.
Мәжілістің VI шақырылымындағы ІІ сессиясында ақжолдықтар тарапынан заң жобаларын талқылау кезінде 700 ұсыныс түссе, әр сала бойынша 63 сұраным жіберіліпті. Парламент Мәжілісінің отырыстарында Меруерт Қазбекованың айтуынша, ақжолдықтар осы жайлар бойынша жиі мәселе көтерген. Солардың ішінде еліміздегі балалар емханасын қайтадан қалпына келтіру, педиатр мамандарын даярлау сияқты өзекті жайлар бар.
– Елбасы мақаласы бәрімізге ой салды. Соған сай қорытындылар жасадық. Рухани жаңғыру – тек қана ой-толғану емес, мақалада іс жүзінде іске асырылатын міндеттер айтылғаны белгілі. Өйткені біз құндылықтарымызға негізделген экономика жасау жолында бірлесе еңбек етіп, қызмет жасаудамыз, – деді депутат М.Қазбекова.
Кездесуге жиналған кәсіпкерлер депутатқа өздерінің өтініш-тілектерін айтты. Мәжіліс депутаты айтылған барлық мәселелер, өтініштер қаралып, «Ақ жол» партиясы депутаттарының алдағы жұмыс барысында жалғасын табатынын жеткізді.
Фарида БЫҚАЙ,
«Егемен Қазақстан»
ПАВЛОДАР
