– Жолдан бұрын ауылымызға мәдениет үйі керек болып тұр. Жолдың нашарлығына шыдап келдік, шыдай береміз де. Өзің көріп тұрғандай, біз алыстағы орманды ауылда тұрамыз. Біз бәріміз ауыл болып «Егеменді» оқимыз, күнделікті пошта қазір келіп тұрады. Бұрынғы аудан әкімдерінің бәрі уәде берді, бірақ Есілбайда мәдениет үйі әлі ашылған жоқ. Осы мәселені енді газетіңе жазсаң, – деді ауылдықтардың атынан сөз алған жергілікті кәсіпкер, аудандық мәслихаттың депутаты Қисамиден Мақауұлы.
Негізі ауылдың бас көтерері, әрбір іске бастамашысы, демеушісі де осы кәсіпкер көрінеді. Ауылда «Қазақ хандығының 550 жылдығына» арналған ескерткіштің ашылуына, «Мәңгілік ел» бейнелі стелласының жасалуына, балалар ойнайтын ойын алаңын жасауға үлес қосыпты.
Шегірен ауылдық аумағына қарасты Есілбай ауылында 650-дей адам тұрады. Ауылдықтардың дені орманшы, Сейтен орман шаруашылығында еңбек етуде. Күндіз-түні қалың қарағайлы ағашты өрттен қорғап, аң-құстарын сақтауға үлес қосуда. Сондықтан, кішкентайларынан қалың ағашқа көздері үйреніп, бүлдіргенін, қарақатын теріп жейтін балалар әке, ағаларының жолын қуып орманнан алыс кете алмайды екен. Солардың бірі – Қобыланды Атығай С. Торайғыров атындағы университеттің орман шаруашылығы факультетін бітіріп, қазір шаруашылықта қызмет атқаруда.
Ауыл мектебінің алдында ойлана қарап Шоқан Уәлихановтың мүсіні тұр. Күтім қажет-ақ. Жалпы, мектептің сыртқы көрінісі де жүдеу тартып тұр. Мектеп 1992 жылы жаңадан салынып, пайдалануға беріліпті. Айтпақшы, 1990 жылы мектептің құрылыс жұмыстары тоқтап қалған кезде ауылдың өтінішін арқалап, марқұм Қайкен Исабек ақсақал Алматыға дейін барған. Шегірен кеңшарының директоры Қалау Қаратайұлы осы мектепті салуға бастамашы болып, ауыл көшелерін жөндеп беріпті. Қазір мектепте 77 оқушы білім алуда.
– Мен осы ауылда туып-өстім. Мектепте талай жыл мұғалім болдым. Осы жақында ғана әкімдік қызметке келдім. Бірлесіп «Туған жер» бағдарламасы аясында жұмыс жасаймыз деп ойлаймын, – дейді ауыл әкімі Жасұлан Әбелдинов.
Ауыл дастарқаны мол, қаймақ, сүт, балқаймақ, құрт, ірімшік, нан-тоқаш дейсіз бе, бәрі жайнап тұр, мал-жан аман. Әттең, қолдары жетпей тұрған әлеуметтік мәселелер – жол, ең бастысы, мәдениет үйі керек. Әкімдер талай жылғы өтінішті орындап, шалғайдағы ауылды қуантса екен дейміз.
Фарида БЫҚАЙ,
«Егемен Қазақстан»
Павлодар облысы,
Есілбай ауылы