2017-2018 оқу жылында өңірде 381 мемлекеттік күндізгі жалпы білім беретін мектепте 94 мыңнан астам оқушы білім алады деп күтілуде. Өңірдегі мектеп саны былтырғы оқу жылымен салыстырғанда 3 бірлікке азайған. Қазталов ауданында Хайруш және Саралжын бастауыш мектептері, Теректі ауданындағы Қандық бастауыш мектебі оқушы саны азаюына байланысты жабылды. Оқушы саны тұрақты көбейіп, дәрежесі жоғарылап жатқан білім ордалары да бар. Мысалы, Ақжайық ауданы Атамекен ауылындағы М.Өтемісов атындағы негізгі мектеп орта мектепке айналды. Енді бұл мектепке жаңа ғимарат керек. Жарты ғасыр бұрын салынған көне мектеп ғимаратының жағдайы сын көтермейді.
Дәл қазір облыста 9 білім нысанының құрылысы жүріп жатыр. Мәселен, Орал қаласының Деркөл кентінде әрқайсысы 600 орындық 2 мектеп, Қашаған кентіндегі Сарытау шағын ауданында 900 орындық мектеп Ұлттық қор есебінен жаңадан салынса, Орал қаласында №4 мектептің апатты жағдайдағы ғимараты да қайта көтеріліп жатыр. Бұл құрылыстың бәрі де биылғы қараша-желтоқсан айларында пайдалануға берілмек. Сондай-ақ, республикалық бюджет есебінен Зеленов ауданы Дариян ауылында 100 орындық интернатымен 300 орынға арналған мектеп ғимараты салынып жатыр. Жергілікті бюджет есебінен Қазталов ауылындағы 100 орындық мектеп жанындағы интернат пен Бөрлі ауданының Кеңтүбек ауылындағы 50 орындық балабақша ғимараттары тұрғызылуда. Ал Бөрлі ауданының Аралтал ауылындағы 300 орындық және Ақжайық ауданының Шардаршап ауылындағы 198 орындық мектептер шетел инвестициясы есебінен салынып жатыр.
Бұған қоса, жергілікті бюджет есебінен 12 білім беру нысанына жалпы сомасы 1241,0 млн теңгені құрайтын күрделі жөндеу жұмыстары жүргізілуде, дейді Зәуре Базарғалиқызы. Қазіргі таңда 5 білім нысанында күрделі жөндеу жұмыстары аяқталған. Білім мекемелерінің 71%-ында жылыту жүйесінің алдағы қыс маусымына дайындығы тексеріліп, бұл жұмыс әрі қарай жалғасуда.
Өңірде 2016 жылдан бастап жаратылыстану-математика бағытындағы пәндер бойынша 563 педагог жергілікті бюджет есебінен ағылшын курстарында білімін жетілдірген. Енді осы пәндерді ағылшын тілінде оқыту эксперименті жүргізілетін мектептердің тізімі анықталып, 13271 дана ағылшын тіліндегі оқулық пен оқу-әдістемелік кешенге тапсырыс берілген.
– Облысқа қажетті мектеп оқулықтарын сатып алу үшін жергілікті бюджеттен 2 334,9 млн теңге бөлінді. Жаңартылған білім мазмұнына көшуге байланысты 2, 5, 7 сыныптардың барлық оқулығы, мектепалды даярлық, арнаулы мектеп оқулықтарына, ағылшын тілінде жаратылыстану бағытындағы оқулықтар және қорды толықтыру бағытында барлығы 1 244 000-нан астам дана оқулық пен оқу-әдістемелік кешендерге тапсырыс берілді. Баспалармен келісімшарттар жасалып, оқулықтарды тасымалдау басталды. Қазіргі таңда оқулықтардың 20 %-ы аудандар мен қалаға жеткізілді. Оқулықтарды тасымалдау тамыз айының 30-ына дейін жүргізіледі, – дейді білім басқармасының басшысы.
2016-2017 оқу жылында облыстың білім беру мекемелерінде 21 850 педагог, жалпы білім беретін мектептерде 11 971 мұғалім қызмет еткен еді. Өткен оқу жылының соңында 105 педагогикалық қызметкер тапшы болған. Қазақ мектебінде орыс тілі мен әдебиеті, математика пәндерінің мұғалімдері жетіспейді.
Қазбек ҚҰТТЫМҰРАТҰЛЫ,
«Егемен Қазақстан»
Батыс Қазақстан облысы