Облысқа жұмыс сапарымен келген депутат қала мектептерінің мұғалімдерімен және БАҚ өкілдерімен кездесіп, Елбасымыздың «Болашаққа бағдар: рухани жаңғыру» мақаласына қатысты түсіндіру жұмыстарын жүргізді. Мақалада көрсетілген аспектілер – бәсекелік қабілет, прагматизм, білімнің салтанат құруы, сананың ашықтығы мәселелерін кеңінен айтып өтті. Бағдарламалық мақаланың облыста іске асу тетіктеріне тоқталып, Қазалы және Қармақшы аудандарында атқарылған жұмыстарға оң бағасын берді.
Сонымен бірге, Наталья Жұмаділдаева өзінің депутаттық қызметі туралы баяндады. Екінші сессияда атқарған жұмыстары мен қазіргі қаралып жатқан заң жобалары жайлы мағлұмат беріп, облыс тұрғындарынан заң жобаларына өз ұсыныстары мен пікірлерін жолдауды сұрады. Қабылданған немесе қазіргі қарауда жатқан заң жобаларының халық арасында пайдаланылудағы жағдайын зерделеп, қажет болған жағдайда, ұсыныс беріп, жерлестерінің өтініштерін жеткізетінін мәлімдеді.
Кездесуге қатысушылардың пікірін тыңдап, сұрақтарына жауап беріп, барша ұстаздар қауымын жаңа оқу жылымен құттықтады.
«Егемен-ақпарат»