Екі ел арасындағы дипломатиялық қарым-қатынас орнағалы бері саяси диалогтар жасалып, тауар айналымы көбейіп, мәдени-гуманитарлық әріптестік кең өріс алды. Елші Германияның Қазақстанды талай мәрте әлемдік аренада қолдағанын айтты.
«Германия еліміздің Еуропадағы қауіпсіздік және ынтымақтастық ұйымының саммитіне төрағалық етуін, ЭКСПО-2017 халықаралық көрмесін өткізуін құптап, Дүниежүзілік сауда ұйымы құрамына кіруге ықпал жасады. Қазақстан да өз кезегінде немістердің БҰҰ Қауіпсіздік Кеңесінің тұрақты мүшелігіне өтуін толық қолдайды», – деді Болат Нүсіпов.
Қазақстан мен Германия арасында түрлі деңгейдегі дипломатиялық қатынастар жолға қойылған. Мәселен, 2016 жылы екі тараптың делегациялары өзара 39 мәрте іссапарға шыққан. Биылдың өзінде 25 рет саяси жиын өткізіліпті. Оған қоса, «бундес елдің» президенті Франк-Вальтер Штайнмайер биыл Қазақстанға ресми сапармен келіп, ЭКСПО-2017 халықаралық көрмесіндегі неміс күндерінің ашылу салтанатына қатысты. Германия басшысының осы сапары нәтижесінде құны 1 миллиард долларлық 21 жобаны іске асыру жөніндегі екіжақты келісімге қол қойылды.
Елшінің мәліметтеріне сүйенсек, Қазақстан мен Германия арасындағы сауда және экономикалық байланыс та қарқын алып келеді. 2016 жылы екі ел арасындағы тауар айналымы 4 миллиард еуроны құраса, биылғы 5 айдың өзінде 2,1 миллиард еуроға жеткен. Бұл өткен жылғы осы уақытпен салыстырғанда 36 пайызға көп. Болат Нүсіпов биыл сауда және экономикалық қатынастың ауқымы 45 пайызға өсетініне сенімді екенін мәлімдеді.
Инвестиция саласында да қарқынды ілгерілеушілік байқалады. 2005-2016 жылдар аралығындағы Германияның елімізге құйған қаржы көлемі 4 миллиард долларды құраған. Елшінің айтуынша, бұл үлкен сома емес, алайда, инвестицияның басым бөлігі өнеркәсіп саласына бағытталған. Сонымен қатар, бұрын Қазақстанда тұрған немістердің көбі елімізде өз кәсібін ашуды жөн санайды екен.
«Қазақстаннан Германияға көшіп барған немістер екі ел арасындағы көпір іспетті. Олардың кейбірі елімізге оралып, кәсіптерін ашып жатыр. Тіпті Германияда да табысқа жеткендері бар. Мысалы, бұрын Қазақстанды мекен еткен Карин Штренц бүгінде Бундестагтың депутаты», деді Болат Нүсіпов.
Елші Германияда өмір сүріп жатқан қазақтарға да тоқталды. Оның айтуынша, Бетховен мен Гетенің отанында мыңға жуық қандасымыз тұрады. Елде қазақтарға арналған 3 мәдени мекеме бар. Болат Нүсіпов неміс еліндегі қандастарымызды әрдайым қолдап отыратынын жеткізді. Мәселен, елшіліктің қолдауымен 2011 жылы Копенгагенде, 2014 жылы Берлинде, 2016 жылы Кельнде қазақ диаспораларының Кіші құрылтайы өтті. Сондай-ақ, 2014 жылдан бері елшіліктің жанынан қазақ тілін үйрету курсы ашылған.
Абай Асанкелдіұлы,
«Егемен Қазақстан»
