– Балаларымыз үшін осындай концерт ұйымдастырған әкімдікке үлкен рахмет. Осындай мерекелер көп болсын. Жексенбі сайын балаларымызбен, немерелерімізбен бірге әсерлі концерттер тамашалап, рахатқа бөлендік, – дейді зейнеткер Дәметкен Әбдірахманова.
Апта сайынғы «Думанды Сарыарқа» жексенбілік концерттер аясында танымал қазақстандық әртістер Досымжан Таңатаров, Маржан Арапбаева, Гүлзира Бөкейхан, Дос, ағайынды Жүгүнісовтер триосы, сондай-ақ, сықақшы Қанат Әлжаппаров пен Қайрат Әділгерей және тағы басқалар өнер көрсетуде. Мерекелік шаралар Пригородный, Интернациональный, Мичурин, Күйгенжар, Өндіріс, Железнодорожный, Үркер, Көктал және Промышленный тұрғын алаптарында өткізілді. Концерттік бағдарлама барлық жастағы көрермендерге арналған. Баршаға белгілі орындаушылардан басқа концерттерге би және музыкалық ұжымдар, көше театрларының әртістері, аниматорлар, бойшаң қуыршақтар қатысады, интерактивті ойын-сауық бағдарламалар ұйымдастырылады. Көрермендердің көзайымына айналған «Думанды Сарыарқа» концерттерінің бағдарламасы осындай. Балалар ертегі кейіпкерлеріне қосылып би билейді, ән айтады және түрлі ойындар ойнайды.
– ЭКСПО-2017 халықаралық мамандандырылған көрмесін өткізу аясында қала әкімдігі көпшілік назарына ауқымды мәдени-бұқаралық шаралар ұсынды – халықтық серуен, мәдени-бұқаралық, отбасылық демалыс, фестивальдер, көрмелер, театрландырылған және цирк қойылымдары және басқа шаралар өткізілді. Қала маңындағы елді мекендердің тұрғындары да мерекеден тыс қалмауы үшін әр демалыс сайын мұнда да белгілі әртістердің қатысуымен концерттер ұйымдастырамыз, – дейді Астана қаласының мәдениет, мұрағаттар және құжаттама басқармасының басшысы Болат Мажағұлов.
Астанада ЭКСПО көрмесі шеңберінде белгіленген мәдени-бұқаралық шаралар легі 1 маусымда отандық және ресейлік үздік әртістердің қатысуымен өткен Open Air концертімен ашылған еді. «Қазақ Елі» монументінің алдындағы ашық алаңда өткен шараға 50 мыңнан астам көрермен жиналды. Бұдан басқа, Жоғары лиганың соңғы жылдардағы чемпиондарының қатысуымен өткен КВН жазғы кубогы, Олимпиада чемпионы Евгений Плющенконың әлемдік турнесі аясында ұйымдастырылған мұз айдынындағы «Щелкунчик» ғажайып шоу-ертегісі, Астанадағы Сан-Ремо италиялық музыка фестивалі, «Астана Арқау» дәстүрлі қазақ музыкасының концерттері және танымал қазақстандық эстрада орындаушыларының «МузАрт» тобының, «Дервиши» тобының шығармашылық кештері, Секен Тұрысбектің, Алтынбек Қоразбаевтың, Роза Рымбаеваның, Айқын Төлепбергеннің және басқа шығармашылық кештердің елорда жұртшылығы мен қонақтарын тамаша әсерге бөлегенін ерекше атап айтқан жөн.
Демалыс күнгі «Думанды Сарыарқа» концерттері 11 маусымда бастау алған болатын. Екі айдан артық уақыттың ішінде 120-ға жуық концерт өткізілді.
Айта кетерлік жайт, «Думанды Сарыарқа» қорытынды концерті Конституция күніне орайластырылып, 30 тамызда өткізіледі.
27 тамызда елорда тұрғындары мен қонақтары тағы да бір ауқымды шараны тамашалайды. Астанада алғаш рет қазіргі заманғы музыка орындаушыларына мүсіншелер табыстау салтанаты өтті. Бірінші жыл сайынғы «Астана дауысы» халықаралық фестивалінде 15 мемлекеттің жылдың үздік әншілері бағын сынады. Қазақстанның төрінде бір сахнада музыка индустриясына бағыт беретін әртістер – Григорий Лепс, Светлана Лобода, Бьянка, Вилли Уильямс, Ильяс Ялчинташ, Араш, DJ Sava, Ева Симонс және тағы басқалар өнер көрсетті. Фестивальға Қазақстанның атынан белгілі әнші Қайрат Нұртас қатысып, ән шырқады. Ауқымды концерт Бейбітшілік және келісім сарайында өтті.
Жылқыбай Жағыпарұлы
Егемен Қазақстан
суретті түсірген Ерлан Омар
Егемен Қазақстан
