Жарыстың алтыншы күні таэквондошы қызымыз Жансел Дениз 73 кило салмақ дәрежесінде сынға түсіп, алтын жүлде үшін болған бәсекеде оңтүстіккореялық Ли Да Биннен 11:34 есебімен жеңіліп қалды.
Универсиаданың күміс жүлдегері финалға дейін Сюзан Розе Барнетт (Чили), Яна Шнайдер (Германия) және Митси Толедоны (Мексика) жарыс жолынан шығарды. Ал жартылай финалда түркиялық Сюде Булуттан басым түскен болатын.
Ал бұрнағы күні Қазақстанның таэквондодан ерлер арасындағы құрамасы жартылай финалда Ресей командасынан 10:18 есебімен жеңіліп, қола жүлдені қанағат етті. Біздің команданың құрамында Нұрсұлтан Мамаев, Сұлтан Қалибекұлы және Смайыл Дүйсебай өнер көрсетті.
Жазғы универсиада сынындағы жалпыкомандалық есепте Жапония атлеттері 74 медальмен (29 алтын, 18 күміс және 27 қола) көш бастап келеді. Екінші орынға табан тіреген Оңтүстік Корея құрамасының еншісінде 69 жүлде бар (26, 18, 25). Ал әзірге үздік үштікті түйіндеген Тайвань құрамасы 55 медаль жеңіп алды. Оның 17-сі алтын, 22-сі күміс және 16-сы қола медаль.
Қазақстандық студенттер әзірге 3 алтын, 4 күміс және 6 қола жүлдемен (барлығы – 13) 15-ші орында келеді.
Қайрат ӘБІЛДА,
«Егемен Қазақстан»