28 қазанда Астанада Азиядағы өзара іс-қимыл және сенім шаралары жөніндегі кеңестің (АӨСШК) гуманитарлық өлшемі шеңберінде «Тұрақты демократиялық даму: дәстүрлер мен заманауи тәжірибе» тақырыбымен жоғары деңгейдегі семинар өтеді, деді дәстүрлі апталық брифингте СІМ-нің ресми өкілі А.Әбибуллаев.
Осы іс-шараға Азиядағы өзара іс-қимыл және сенім шаралары жөніндегі кеңеске мүше елдердің өкілдері, Қазақстан Парламенті депутаттары, Жоғарғы Сот, Бас прокуратура, Сыртқы істер, Мәдениет, Әділет министрліктері, Адам құқықтары жөніндегі ұлттық орталық пен үкіметтік емес ұйымдар өкілдерінің қатысуы жоспарланыпты.
Семинар барысында сайлау, атқарушы, сот органдары, адам құқықтары жөніндегі уәкілдер мен қоғамдық ұйымдардың Азиядағы өзара іс-қимыл және сенім шаралары жөніндегі кеңеске мүше мемлекеттердің демократиялық дамуындағы рөліне байланысты мәселелердің кең ауқымы талқыланды деп күтілуде екен. Ресми өкіл сондай-ақ 30 қазан мен 1 қараша аралығында Қазақстан Республикасының Президенті Н.Назарбаевтың Вьетнам Социалистік Республикасы Президентінің шақыруымен Вьетнамға ресми сапары өтетінін жария етті. Сапар шеңберінде Мемлекет басшысының Вьетнам жоғарғы басшылық өкілдерімен келіссөздері жоспарланып, түрлі салалардағы өзара ынтымақтастықты қамтитын бірқатар құжаттарға қол қоюы күтілуде, деді А.Әбибуллаев. Сонымен қатар, екі елдің іскер топтары өкілдерінің қатысуымен Қазақстан-Вьетнам бизнес-форумы өтпек. Ресми өкілдің айтуынша, Қазақстан Президентінің Вьетнамға тұңғыш сапары екіжақты ынтымақтастықты одан әрі дамытуға жаңа серпін береді деп күтіліп отыр.