Кеше Парламент Сенатының Төрағасы Қайрат Мәмидің төрағалық етуімен өткен Парламент Сенаты бюросының отырысында Мәжілісте мақұлданған заң жобалары тұрақты комитеттер мен Сенат аппаратына берілді, деп хабарлады осы палатаның баспасөз қызметі.
Заңнама және құқықтық мәселелер комитеті «Қазақстан Республикасының Үкіметі мен Есірткі құралдарының, психотроптық заттар мен олардың прекурсорларының заңсыз айналымына қарсы күрес жөніндегі Орталық Азия өңірлік ақпараттық үйлестіру орталығы арасындағы Алматы қаласында Орталықтың орналасу шарттары туралы келісімді ратификациялау туралы» заң жобасын одан әрі зерделеуде бас комитет болып белгіленді.
Экономикалық даму және өңірлік саясат комитеті «Қазақстан Республикасы мен Азия Даму банкі арасындағы Қарыз туралы келісімді (Жай операциялар) (ОАӨЭЫ 1 көлік дәлізі [Жамбыл облысындағы жол учаскесі] [Батыс Еуропа – Батыс Қытай халықаралық транзит дәлізі] Инвестициялық бағдарлама – 4-жоба) ратификациялау туралы» заң жобасы бойынша негізгі комитет болып белгіленді.
Бюрода сондай-ақ биылғы 27 қазанда болатын кезекті Сенат отырысының күн тәртібі бойынша ұсыныстар да талқыланды. Атап айтқанда, «Қазақстан Республикасының Үкіметі мен Қырғыз Республикасының Үкіметі арасындағы өтеусіз әскери-техникалық көмек көрсету туралы келісімді ратификациялау туралы» заң жобасын талқылау көзделіп отыр.
Отырыста басқа да заң жобалары қаралатын болады.