КӘСІПТІК-ТЕХНИКАЛЫҚ ЛИЦЕЙ АШУ – ҚАЖЕТТІЛІК
Баянауыл ауданына қарасты Майқайың кентінде 10 мыңдай халық тұрады. Оның арасында 2 мыңнан аса оралман ағайын бар. Өндіріске барып жұмыс жасағысы келетін жас көп. Өндіріс орындары да жеткілікті. Сондықтан мұнда кәсіби мамандарға деген сұраныс та жоғары. Осы себепті кентте арнайы кәсіптік мектеп ашу қажеттігі байқалады.
«Егемен Қазақстанның» Павлодар облысындағы тілшісі Фарида Бықай Майқайың кентінің әкімі Орда Ермекбаевқа:
– Сіз бұған не дейсіз?
– Бұл – бүгінгі күннің сұранып тұрған өткір мәселесі. Кент жастары да, олардың ата-аналары да осы жаңалықты асыға күтіп жүр. Жалпы, газбен дәнекерлеушілер, тау-кен ісінің шеберлері, электрші мамандар қажет-ақ. Кентке көршілес ауылдардан да келетін жастардың арнайы білімдері жоқ. Соның салдарынан олардың дені қара жұмысты кәсіп етеді. Кәсіпорын басшылары жыл сайын Павлодар мен Екібастұз қалаларындағы кәсіптік оқу орындарына көптеген жастарды оқуға жібереді. Дегенмен, өндіріс орындарының кеңейіп, өнім өндіру көрсеткіштерінің артуы білікті мамандардың көбеюін талап етуде. Бұл мәселені шешудің жолы – Майқайыңның өзінде кәсіптік-техникалық оқу орнын ашу. Сонда техникалық мамандарға деген зәрулік те болмас еді.
Арнайы бағдарлама бойынша мамандар даярлауға Екібастұз қаласындағы №18 кәсіптік лицейге, облыс орталығындағы №15 лицейге биылғы мектеп бітірген түлектер оқуға жіберілді. Ал, қайта даярлауға Екібастұз қаласындағы №4, 18, 27 кәсіптік лицейлерге, облыс орталығындағы №5, 1 кәсіптік лицейлерге 3 ай оқу мерзіміне жастар оқып келмекші. Біліктілігін арттыру үшін Екібастұз қаласындағы медициналық колледжге, облыс орталығындағы ақпараттық технология колледжіне бухгалтер мамандығы бойынша оқуға жіберілгендер де бар. Жалпы, Майқайың кентінен кәсіптік даярлауға, қайта даярлауға және біліктілігін арттыруға 50 жас жіберіліп отыр. Барлығына жүріс-тұрысы үшін 12000 теңге, стипендиясына 7 мың теңге және қалада тұрғаны үшін 15 мың теңге төленеді. Кенттің өз кәсіптік оқу орны болса, осыншама шығын шықпас еді.
Павлодар облысы.