22 қазан күні Токио (Жапония) қаласында абсолюттік салмақ категориясы бойынша шинкиокушинкай каратэден Х әлем чмпионаты басталды. ТМД, Еуропа және Жапония елдерінің күшті каратэшілері қатысып жатқан бұл чемпионат төрт жылда бір рет өтеді.
Қазақстандық делегацияның басшысы Астана қалалық шинкиокушинкай каратэ федерациясының президенті, «Нұр Отан» ХДП Астана қалалық филиалы төрағасының бірінші орынбасары Әмірхан Рахымжанов.
Ал әлем чемпионатына мына спортшылар қатысуда: Владимир Артюшин (Астана) – қара белбеу, 1 дан; Мария Гриднева (Астана) – қара белбеу, 2 дан; Сергей Лаптев (Алматы) – қызыл қоңыр белбеу; Алексей Леонов (Алматы) – қара белбеу, 2 дан; Мерей Сүйінов (Талдықорған) – қара белбеу, 1 дан; Илья Яковлев (Өскемен) – қара белбеу, 1 дан.
Чемпионатқа қатысушылар өз бапкерлерімен бірге мықты дайындық жаттығуларын жүргізді. Сондай-ақ, Қазақстан құрамасының бас бапкері және республикалық федерацияның жетекші бапкерлерінің басшылығымен үш кезеңнен тұратын жаттығу-машықтану жиыны өткізілді. Жиындардың бірінші кезеңі шілде айында Астана қаласында, екіншісі тамыз айында Өскемен қаласында және қорытынды үшінші кезеңі қазанда Алматы қаласында ұйымдастырылды.
Қазақстан осы жекпе-жек түрі бойынша әлемнің он үздік елінің қатарына кіреді.
«Егемен-ақпарат».