Қазақтың балуаны, әнші-композитор, сері, халық арасында Балуан Шолақ атанған Нұрмағанбет Баймырзаұлының өмірінен сыр шертетін қойылымды театр ұжымы 1 қазан күні Стокуелл театрының (Stockwell Playhouse) сахнасында жиналған көрерменге ұсынды. Күрескер тұлға Балуан Шолақтың сахналық бейнесін театрымыздың талантты актері, сахна шебері Ерлан Біләл сомдады.
Лондондағы бұл фестиваль белгілі қазақ жазушысы, драматург Дулат Исабековтің 75 жылдығына орай ұйымдастырылып отыр. Биыл үшінші мәрте өткізіліп отырған фестивальдің ұйымдастырушысы – Лондондағы Айтматов академиясы. 2011 жылы Лондон қаласында профессор, философия ғылымдарының докторы Рахима Абдувалиева негізін қалаған Айтматов академиясы – әйгілі жазушының шығармаларын әлем тілдеріне аударумен және ұлы жазушы қалдырған мол мұраны дәріптеумен айналысады.
Елімізде өткен ауқымды, маңызды жобалардың бірі – Экспо-2017 халықаралық мамандандырылған көрмесінің мәдени бағдарламасы аясында көптеген іс-шаралардың атқарылғандығы баршамызға белгілі. Әртүрлі бағытта өткен театр және кино фестивальдері, әрқандай концерттер мен көрмелер қазақстандықтар мен шетелдік қонақтарға ерекше әсер қалдырса, өз саласының мамандары үшін тәжірибе алмасу мектебі болды. Экспо-2017 көрмесі негізінде өткен мәдени және спорттық шаралардың жоғары деңгейде ұйымдастырылуы – Мәдениет және спорт министрлігінің қажырлы еңбегінің жемісі. Халықаралық көрменің Ұлыбритания павильонында өткен ағылшын тіліндегі шығармалардың тұсаукесерінде жазушы-драматург Дулат Исабековтің шығармаларын алыс-жақын шетелден келген меймандар жоғары бағалаған болатын.
Англия парламентінің жоғарғы Лордтар палатасындағы Дулат Исабековпен кездесу өте әсерлі болды.
Мәдениет және спорт министрлігінің осы келелі іс-шараны мойнына алып, қазақ театр өнерінің әлем сахнасында салтанат құруына атсалысуы – ұлт руханиятының әлемдік кеңістікте еркін көсілуіне өз септігін тигізді.
Гүлзия СӘДУАҚАСОВА
