Олардың арасында Османакун Ибрайымов сынды сөзі салмақты мемлекет және қоғам қайраткерлері де бар екенін жазған болатынбыз. Өткен жұма күні Қырғызстанның тағы бір экс-мемлекеттік хатшысы, «Бүтін Қырғызстан» партиясының басшысы Адахан Мадумаров та бауырлас қазақ пен қырғыздың қарым-қатынасын ешкімнің сөзі бұза алмайтынын айтып, Елбасы Нұрсұлтан Назарбаевқа өз өтінішін білдірді. Оның бұл мәлімдемесі «Youtube.com» бейне-порталы арқылы жарияланды.
«Мен мүмкіндікті пайдаланып, Қазақ еліне, Елбасына, бүтін түрік дүниесінің ақсақалы атанған Нұрсұлтан Әбішұлына өтініш білдіремін. Әрдайым қырғыз-қазақ қарым-қатынасын асылдай ардақтап, мәуелі мәміле жасап келдіңіз. Соның бәрі бір кісінің кесапатынан бүтін жұртқа зиянды болмаса екен дегім келеді. Айтқан кісінің сөзі мен өзі кете берсінші, бірақ қалқайған қалың жұрт зиян шекпесе екен», деген А.Мадумаров осы мәлімдемесінде Елбасының «Қырғызға мендей күйетін азамат менен кейін келе ме, келмей ме, білмеймін» деген сөзін еске алып, Нұрсұлтан Әбішұлының асқан сабырлық танытып отырғанына айрықша ризашылығын білдіреді.
Сондай-ақ «салқын тартып бара жатқан екі елдің арасындағы қарым-қатынасты қайта бір пысықтап қойсаңыз» деген өтінішін жеткізеді. «Мен ресми түрде осылай қазақ билігіне өтініш білдіремін. Құдай бұйырса, бұл күндер өтеді. Біздің арамызды ешкім ажырата алған емес. Жаратқан Алла ғана ажыратпаса, қырғыз бен қазақты ешкім ажырата алмайды. Ажыратамыз дегендердің пейілі тасқа ұрылсын», дейді А.Мадумаров.
