Жуырда Мемлекет басшысы Нұрсұлтан Назарбаев латын әліпбиінің ортақ нұсқасын жасайтын жұмыс тобын қабылдағаны белгілі. Кездесу барысында қоғамдық талқылау кезінде алынған ұсыныстар ескеріле отырып дайындалған, латын графигіндегі қазақ әліпбиінің бірыңғай стандартының жобасы ұсынылды. Жұмыс тобының ұсынысымен танысып шыққан Мемлекет басшысы «Мен жариялаған рухани жаңғыру аясында ел болып маңызды жұмыстарға кірісіп кеттік. Соның ішіндегі мемлекеттік тілді реформалау ең негізі, жауапты мәселе болатынын өздеріңіз естідіңіздер.
Әр ұсыныс, әр нұсқа мұқият сарапталды, қаралды. Сол себепті жалпыхалықтық талқылауға түсірдік. Сөз реті келгенде айтайық, әлемнің бірде-бір мемлекеті өзінің әліпбиін енгізуде біз сияқты халықпен ақылдасқан жоқ», – деген болатын. Сондай-ақ Елбасы қазақ жазуының латын қарпіне көшірілуін жіті қадағалап отырғанын жеткізіп, бастама мұқият саралануы тиіс екендігін баса айтты. Қазақ әліпбиін латын қарпіне көшіру – бүгінгі коғам талабы. Бұл бастама бізді өркениетті елдердің қатарына қосылып, болашағымыздың баянды болуына бағыттайтын бастама.
Латын әліпбиі түркі әлемінің ортақтығына алып баратын ізгі бастамалардың бірі әрі бұл қадам арқылы жастардың қазақ тілін меңгеруі жеңілдейтін болады. Сонымен қатар Мемлекет басшысы аталған бастама рет-ретімен, біртіндеп жүзеге асатындығын, тіл реформасы ешкімді алаңдатпауы керектігін жеткізді. Ол өз сөзінде 2050 жылға дейінгі бағдарламада оған басымдық беріліп, 2025 жылға дейін қазақ тілі түгел бұл әліпбиге көшуі тиіс екендігін тілге тиек етті.
Қазіргі таңда қызу талқыға түсіп жатқан бұл бастама арқылы біз білімнің, ғылымның, ІТ технологияның төріне, өркениеттің өріне жетелейтін төте жолға түсуіміз керек. Сондай-ақ біздің латын қарпіне көшпейтінімізді, тек қайта оралатынымызды еске алған жөн. Бұл бастама жастардың тарапынан үлкен қолдауға ие және болашағымызды осы арқылы елестетеміз. Осы тұрғыда коғамның басты қозғаушы күші болып табылатын жастарды латын қарпіне қайта оралу барысында өздерінің ойларын ортаға салып, оны қолдауға шақырамыз.
Берік ӨСКЕМБАЕВ,
«Жасыл ел» еңбек жасақтарының Жамбыл облысы бойынша төрағасы
