Осындай құжат бланкісі алашордалықтарда да болған. Яғни 1917 жылдың аяғында құрылып,1918 жылдың ортасынан бастап ресми іске кіріскен Алашорда ұлт кеңесі (үкіметі), 1920 жылы 9 наурызда Казревком «Алашорда» буржуазиялық үкіметін жою туралы бұйрық шығарғанға дейін бланк қолданып, іс-қызметін жүргізген.
Ресми бланкінің басына, яғни құжат иесі ретінде ат-атауы қойылатын орынға Алашорда ұлт кеңесі өзінің титулын әуелі араб әліпбиі негізінде қазақшалап «Қазақ-қырғыз хүкметі Алаш – Орда» деп жазса, орысша криллицамен «Всекиргизскій народный советь Алаш – Орда» деп таңбалаған. Ресми титулдың астында құжаттың жолданған уақыты мен нөмірі тұр.
Осындай ресми бланкіге жазылған іс-қағаз құжаттарының дені Семей қаласындағы Қазіргі заман тарихын құжаттандыру орталығында сақтаулы. Аталмыш мекеменің ғылыми-анықтамалық және құжаттарды пайдалану бөлімінің басшысы Лаура Қадырованың мәліметіне қарағанда, қордағы құжаттар: Алашорда үкіметінің, Семей облыстық және уездік Алашорда комитетінің және Алаш қайраткерлерінің қызметіне қатысты екен. Сонымен қатар бланкіге жазылған іс-қағаздар Бүкілресейлік уақытша үкіметі Семей облыстық және уездік басқармаларына, Семей губерниялық соты, төңкеріс комитеті, Алаш қалалық қоғамдық басқармасы, Алаш жұмысшы, шаруа және қырғыз депутаттары кеңесі қатарлы ұйымдарға жолданып, алаш қайраткерлері – Ә.Бөкейханов, Х.Ғаббасов, Р.Мәрсеков, Б.Сәрсенов, А.Қозыбағаров, М.Боштаевтардың қолтаңбасы қойылған дейді.
Бұл бланкідегі екінші бір ерекше дүние – құжаттың мекен-жайы «Семей облысы Алаш қаласы» (г. Алаш. Семипалат. обл.) деп көрсетілуі. Яғни, қаланың қазіргі Жаңа Семей деп аталатын бөлігі 1917 жылдан бастап, 1927 жылға дейін «Алаш қаласы» деп аталғанына нақты дәлел осы құжат.
Суреттегі бланкіден алашордалықтардың уездік жер басқармасына жазған хатын оқуға болады. Уақыты «5-ші қазан 1918 жыл» делінген. Құжат нөмірі – 199. Бұл хат жазылған мөлшерде Алашорда үкіметінің ресми іске кіріскеніне төрт-бес ай ғана болған кез. Соның өзінде құжат саны 200-ге иек артқан екен.
Бекен ҚАЙРАТҰЛЫ,
«Егемен Қазақстан»
