Еліміздің инвесторы әрі экономикалық әріптесі қатарындағы АҚШ-пен қатынастарды дамытуға Астана ерекше назар аударатындығын атап өткен Қ.Тоқаев көпсалалы өзара іс-қимылды нығайтуда президенттердің сындарлы үнқатысуы зор маңызға ие екенін алға тартты. Сенат Төрағасының айтуынша, Президент Н.Назарбаевтың АҚШ-қа алдағы сапарының ерекше мәні бар.
Сондай-ақ Парламент жоғарғы палатасының басшысы АҚШ Конгресі мен өзара іс-қимылды тереңдету және парламентаралық ынтымақтастық тетіктерін нығайту жайын да сөз етті.
Сауда-экономикалық байланыстарды ұлғайту келешегі туралы мәселені талқылау барысында Джексон-Вэниктің Қазақстанға қатысты түзетулерінің күшін АҚШ Конгресі жоюы қажеттігі туралы ортақ пікірге келді.
Қ.Тоқаев барлық этностық және діни топтардың құқықтары мен заңды мүдделерін қорғауға бағытталған елімізде жүзеге асырылған саясат туралы америкалық делегацияны хабардар етіп, Әлемдік және дәстүрлі діндер көшбасшыларының барлық бес съезіне иудаизм өкілдерінің белсенді қатысқанын атап өтті.
Д.Рубин бейбітшіл сыртқы саясат жүргізудегі және БҰҰ Қауіпсіздік Кеңесіндегі нәтижелі жұмысы үшін Қазақстанға алғыс айта отырып, еліміздің этностық, діни және мәдени бостандықтар мәселелерінде бүкіл әлем үшін үлгі болып отырғанын жеткізді.
Әңгіме барысында ядролық қарусыздану, жаһандық және аймақтық қауіпсіздік мәселелеріндегі Қазақстанның бастамалары да талқыланды.
