Бес күнге жалғасатын жиында қатысушылар көшбасшылық негіздері, оның ішінде персоналды көшбасшылық пен командаға ұйытқы болу, ұйымды трансформациялау, ішкі және ұйымаралық коммуникация мәселелері қарастырылуда. Жетекшілерді оқытудың мақсаты – «А» корпусындағы мемлекеттік қызметкерлердің әлеуетін қамтамасыз ету және дамыту.
Семинарды Қазақстан Президенті Әкімшілігі Басшысының орынбасары Оңдасын Оразалин, мемлекеттік қызмет саласындағы Астана өңірлік хабы Басқарушы комитетінің төрағасы Әлихан Байменов және Назарбаев Университеттің президенті Шигео Катсу құттықтау сөздерімен ашты.
Әлихан Байменов өзінің сөзінде Қазақстанның мемлекеттік қызметін жетілдіруде «А» корпусының, кәсіби мемлекеттік қызметтегі ең жоғары лауазымдар – жауапты хатшылар мен аппарат жетекшілерінің орны ерекше екенін атап өтті. «Мемлекеттік органдардың стратегиялық жоспарларға сай ырғақты жұмысын қамтамасыз етіп, кадрлар қызметін үйлестіретін жауапты хатшылар мен аппарат жетекшілерінің көшбасшылық қасиеттері арқасында мемлекеттік органдарда мамандардың әлеуетін ел игілігіне жұмсауға мүмкіндік беретін тиісті ахуал қалыптасады», деді. Сондықтан ол жауапты хатшылар мен аппарат жетекшілерінің мемлекеттік органдардағы менеджмент пен көшбасшылық бойынша озық идеяларды меңгеруі маңызды екенін сөз етті.
Семинар жұмысына «А» корпусының 35 мемлекеттік қызметкері – министрліктердің жауапты хатшылары мен облыс әкімдіктерінің аппарат жетекшілері қатысуда. Дәрістер кезінде қатысушылар команданың тиімділігіне әсер ететін факторларды, менеджерлер мен көшбасшылардың рөлі мен міндеттерін қарастырып, талдайтын болады. Олар басқарудағы күрделі міндеттерді орындау тәсілдерін меңгеріп, жаңа құндылықтар мен мәдениеттерге бейімделу арқылы жаһандық заманауи сынақтарға төтеп беру жолдарымен танысады.
«Егемен-ақпарат»
