Еңбек ұжымдарымен болған кездесулерде вице-министр Берік Арын елдегі діни ахуалды жақсарту бойынша қабылданатын шаралар туралы, деструктивті ағымдардың ықпалына және қызметіне қарсы тұру жайында әңгімеледі. Вице-министрдің ақпаратына сәйкес, қазіргі күні министрлік әзірлеп жатқан «Діни қызмет және діни бірлестіктер мәселелері туралы» заң жобасы Үкіметтің қарауына енгізілген.
«Заңнамаға енгізілетін түзетулер елдегі діни ахуалдың тұрақтылығын қамтамасыз етуге, деструктивті діни ағымдардың идеяларын таратуды болдырмауға бағытталған. Сонымен бірге халықтың ұсыныстары да назардан тыс қалмауы қажет, тұрғындар өз тарапынан теріс діни ағымдардың алдын алу жұмыстарында белсенділік танытуы керек», деді ол.
Сенатор Сергей Ершов жезқазғандық жерлестерін аталған мәселеге қарсы күресте қоғамда белсенді болып, барлық күш-жігерлерін біріктіруге шақырды. Халық қалаулысы жас ұрпақтың теріс діни ағымдарға бет бұрмай, одан бойларын аулақ ұстаулары керектігін айтты.
Айта кетейік, Қарағанды облысында бейбітшілік пен келісімді нығайтуға өз үлесін қосып отырған 314 діни бірлестік жұмыс істейді. Дегенмен өңірде деструктивті діни идеологияның таралуына және оның теріс әсер етуіне ықтимал мәселелер әлі де бар.
«Егемен-ақпарат»
