Компания жер қойнауын пайдалану жөніндегі келісімшарттың талабына сай, 2017 жылы Атырау облысының әлеуметтік инфрақұрылымын дамыту және қазақстандық мамандарды оқыту бағытындағы өз міндетін толықтай орындап отыр.
Компания аудандарға ұйымдастырған медиа-турдың мақсаты да нәтижесін тапқан жұмыстарды жұртшылыққа кеңінен жеткізу.
Қызылқоға ауданы
3 күнге жоспарланған медиа-турдың алғашқы күні Қызылқоға ауданындағы ірі ауылдардың бірі – Сағыз селосынан басталды. «Ембімұнайгаз» АҚ 7 650 халық тұратын Сағыз селосындағы 2 пәтерлі 4 үйдің құрылысына қаржылай көмек көрсетті. Жаңа баспаналар әлеуметтік жағынан аз қамтылған отбасыларға, көп балалы отбасыларға, мүмкіндігі шектеулі жандарға, сонымен қатар үй кезегінде бірнеше жыл тұрған ауыл тұрғындарына берілді. Солардың бірі – 73 жастағы кейуана Ару Шелтеуова былай дейді:
– Ұлым мен келінім аяқастынан қайтыс болды. Артында кәмелет жасқа толмаған жеті бала қалды. Немерелеріммен бірге бірнеше жыл қатарынан ескі үйде тұрдық. Облыста қатты нөсер жауын болғанын білесіздер, сол толастамай жауған жауыннан ескі баспанамыз тұруға мүлдем жарамсыз болып қалды. Жаратқанымыз тілегімізді естіп, міне, «Ембімұнайгаз» ұжымы демеушілік етіп осындай су жаңа пәтерге қол жеткіздік. Ембілік мұнайшыларға біз сияқты қарапайым адамдардың жағдайын ойлап, осындай тамаша пәтер салып бергендері үшін мың алғыс!
Облыс орталығынан шалғайда орналасқан Тасшағыл ауылын да «Ембімұнайгаз» АҚ назардан тыс қалдырмады.
Бұл ауылда 100 орындық «Жазира» бөбекжай балабақшасы салынған. Осы ауылдың бұрынғы балабақшасы ескі, тар, небәрі 13 орындық болған екен. Жаңа балабақша толық жабдықталған, ойын және спорт бөлмелері, жатын және ас үй бөлмелерімен қамтылған.
Ал осы балабақшаның жас маманы, дене тәрбиесі нұсқаушысы болып қызмет атқаратын Алтынбек Берікбайұлы балабақша ашылғанға дейін вахталық әдіспен мамандығына еш қатысы жоқ қызметте болған. Балабақша ашылған соң туған ауылында мамандығы бойынша жұмыс тапқан.
Ата-аналар да балаларының заман талабына сай келетін балабақшада тәрбиеленіп жатқанына дән риза.
Сонымен қатар осы ауылда екі пәтерлі бір үйдің құрылысы жақында аяқталып, пайдалануға берілген. Қазір осы үйлерде тәрбиесінде мүгедек баласы бар отбасы мен жергілікті учаскелік инспектор қоныстанған.
Мақат ауданы
Пресс-турдың келесі аялдамасы Мақат ауданы Доссор поселкесі болды. Бұл поселкеге «Ембімұнайгаз» АҚ қаражатына 300 орындық жаңа мектеп салынды. О.Сарғұнанов атындағы мектептің бұрынғы ғимараты 1964 жылы салынып, бүгінде тозығы жеткен. Жаңа мектептің құрылысы толығымен аяқталып, 2017 жылдың қаңтар айында пайдалануға берілген. Тек орыс тілінде білім беретін мектеп жаңа заманғы құрылғылармен, интерактивті тақталы сыныптармен, кең акт залымен қатар түрлі пән және үйірме сыныптарымен жабдықталған. Сонымен қатар мектепалды даярлық тобы да жұмыс істейді.
Исатай ауданы
Исатай ауданының бірнеше елді мекендеріндегі әлеуметтік құрылыстарға компания демеушілік етіп келеді. Тұщықұдық ауылындағы «Құлыншақ» балалар бақшасына қосымша 50 орынды жапсаржай (пристройка) салынды. Бұл жапсаржайдың арқасында балаларға жаңадан жатын бөлмелер мен ойынжайлар беріліп, Атырау облысында теңдесі жоқ Монтессори сыныбы ашылған. Бұл сыныптың ерекшелігі – тіл мүкістігі бар балаларға саусақ ұшы жаттығулары мен ойындары арқылы тіл мүкістігін жоюға мүмкіндік береді.
Соңғы аялдама Жанбай селосы болды. Бұл селодағы 200 орындық мәдениет үй Компанияның қаражатына салынған. Екі қатарлы әсем ғимаратта демалыс күндері балаларға мультфильмдер мен көркем фильмдер көрсетілсе, сабақтан тыс уақытта түрлі үйірмелер жұмыс істейді. Мәдениет үйі басшылығының айтуынша, болашақта өзге үйірмелер, спорт секциялары мен әжелер ансамблін құру жоспарда бар екен.
«Ембімұнайгаздың» игі істері жалғасын таппақ
Компания АҚ ретінде құрылған 2012 жылдан бүгінгі күнге дейін Атырау облысының инфрақұрылымын дамытуға шамамен 2,3 млрд теңге, республикалық және жергілікті бюджетке салық есебінде 654 млрд теңге және демеушілік пен қайырымдылық ретінде 2 млрд қаражат бөлді, деді БАҚ өкілдеріне ұйымдастырған үшкүндік пресс-тур аясында басқарма төрағасының экономика және қаржы жөніндегі орынбасары Рысты Тасмағамбетова.
Компания мұнайлы өңірлердің инфрақұрылымының дамуына үлес қосумен қатар, келісімшарт міндеттемелеріне сәйкес қазақстандық мамандарды қайта даярлауға және қазақстандық студенттердің жоғары және арнаулы орта оқу орындарында білім алуларына қаражат бөліп отыр.
Қазақстандық студенттерді дайындау бағдарламасы:
- студенттердің оқу ақысын төлеу;
- дуалды оқу бағдарламасы;
- стипендия төлеу бағдарламасы;
- студенттердің өндірістік практикадан өтуі бағыттары бойынша жүзеге асуда.
Студенттердің оқу ақысын төлеу бағдарламасы бойынша соңғы 4 жылда 780 студенттің оқу ақысы төленді.
Бұл орайда ескеретініміз, студенттер қатарының азая түсуі оқу ақысының жыл санап өсуіне байланысты түсіндіріледі.
Дуалды оқу бағдарламасы бойынша Атырау мұнай-газ университетімен және APEC Petrotechnic Жоғары колледжімен әріптестік байланыс орнатылған. Аталмыш оқу орындарының 69 студенті бағдарламаға қатысты.
Стипендия төлеу бағдарламасы бойынша APEC Petrotechnic Жоғары колледжінің 5 студенті бағдарламаға қатысты.
Студенттердің өндірістік практикадан өту бағдарламасы бойынша қазақстандық 2 жоғары оқу орнымен және 5 колледжбен байланыс орнатылған.
2014 жылдан бері 748 студент Ембі кен алаңдарында өндірістік тәжірибеден өтті.
2016 жылы «Ембімұнайгаз» АҚ тарапынан үлкен көмекке ие болғандардың бірі Атырау мұнай және газ университетінің студенті Нұрбек Сәкембай былай дейді:
– Қазіргі таңда «автоматтандыру және басқару» мамандығының 3-курс студентімін. Үйімізде мұнайшы болмаса да «Ембімұнайгаз» АҚ оқу ақымды төлеп берді. Бұл мен үшін үлкен қуаныш болса, отбасым үшін үлкен көмек.
Фархат ӘБІЛОВ
