Жаңадан ашылған аумағы 240 шаршы метрді құрайтын «AQMOL» сауда үйінің сөрелерінде 7700 тауар түрі самсап тұрса, соның 500-дейі – ақмолалық тауар өндірушілердің өнімі. Енді күнбе-күн ет пен сүт өнімдерінен өзге кондитер тағамдары, бал және өзге де үлкен сұранысқа ие азық-түлік түрлері жеткізіліп тұрады. Бағасы да қаладағы дүкендердегі орташа көрсеткіштен 10-15 пайызға арзан болады деп күтілуде. Жаңадан алынған әрі ешқандай делдалдарсыз тікелей ауыл шаруашылығы өнім өндірушілермен жеткізілетін азық-түлік өнімдеріне бағаның төмен болуы да сондықтан болса керек.
Өңір басшысының мәліметіне қарағанда, азық-түлікпен қамтамасыз ету жобасын қаржыландыру мақсатында жаңадан құрылған «AQMOL» ЖШС жарғысының 40 пайыздық үлесі «Есіл» ӘКК» АҚ-қа тиесілі болса, қалған бөлігі ірі саналатын ақмолалық өнім өндірушілердің еншісінде. Атап көрсеткенде, олардың ішінде «Родина» Агрофирмасы» ЖШС, «Ижевск» ӨК, «Астана Агро Продукт», «CAPITAL PROJECTS LTD», «Гормолзавод», «Айна» сауда үйі» және өзге де кәсіпорындар бар. Уақыт өте келе әлеуметтік кәсіпкерлік корпорациясы серіктестік жарғылық қорынан шығып, сауда дүкендері ақмолалық өнім өндірушілердің құзырына өтетін болады. Жалпы, жыл соңына дейін аумағы 200-ден 500 шаршы метр аралығындағы 3 дүкен ашылса, келесі жылы тағы осындай 10 сауда нүктесі іске қосылады деп күтілуде.
Ақмола облысының әкімі Мәлік Мырзалин «AQMOL» ЖШС-не неге тек 10 ірі кәсіпорын ғана кіріп отыруына қатысты сауалдың да жауабын айтты. «Бізде ауыл шаруашылығы өнімін өндірушілер қатары өте көп. Бастапқы кезеңде үздіксіз әрі кепілді түрде азық-түлік өнімдерін жеткізіп тұратын он ірі кәсіпорынды әдейі таңдадық. Оларды тұрғындар жақсы біледі», деді Мәлік Кеңесбайұлы. Реті келгенде облыс әкімі елорданың азық-түлік белдеуін және тұтыну рыногын дамыту бүгінгі таңда Елбасы негіздеген маңызды міндет екендігін атай кетті. Астананы азық-түлікпен қамтамасыз ету бағдарламасына сәйкес Ақмола облысындағы 17 ауданның шаруашылықтары елордаға ұн, жұмыртқа, картоп, ет және өзге де өнімдерді үзіліссіз жеткізіп келеді. Қазіргі таңда бағдарлама аясында бағаға ықпал ету, сақтауға кететін шығындарды бақылау сияқты мүмкіндіктерді қамтитын кооперация негізіндегі біртұтас орталық құру жөнінде кешенді шаралар қарастырылуда. Нақты айтқанда, Астана қаласын азық-түлікпен үзіліссіз қамтамасыз ету үшін Ақмола облысы тауар өндірушілерінің көтерме-тарату орталығын ашу көзделіп отыр. Бұл өз кезегінде қала тұрғындарын сапалы азық-түлік өнімдерімен қамтамасыз ету мәселесін толық шешетін болады.
Ең бастысы, тұрғындарды жаңа жұмыс орындарымен қамтамасыз етуді жақсартуға игі ықпалын тигізетін жаңа жұмыс орындары құрылады және бюджетке қосымша салықтық түсімдердің түсуіне оң әсер етеді.
Асқар ТҰРАПБАЙҰЛЫ,
«Егемен Қазақстан»
Ақмола облысы
