Ал форум жұмысын еліміздің туристік оң имиджін қалыптастыру және туристік инфрақұрылымды дамыту мақсатында еңбек етіп келе жатқан «Қазақстан туристік ассоциациясы» ұйымы ұйымдастырды.
Форум жұмысына Қытай, Корея, Малайзия, Германия, Ресей, Қырғызстан, Өзбекстан, Моңғолия және Тәжікстан елдерінен туризм саласына қатысы бар бизнес құрылымдарының өкілдері, сондай-ақ Мәдениет және спорт министрлігінен, облыс әкімдіктерінен, сол сияқты аталған салаға қатысы бар мемлекеттік және үкіметтік емес ұйымдар өкілдері де қатысты.
Форумның алғашқы күні «Қазақстан Республикасында туризмнің және қонақ үй нарығының дамуының қазіргі кездегі жағдайы мен перспективасы» тақырыбында және Жамбыл облысының туризмі мен қонақ үйлердің дамуы тақырыбы төңірегінде дискуссиялар мен тұсаукесерлер өткізілді. Мұнда Тараз туризмін дамыту мәселесі көтеріліп, тарихи өлкенің бүгінгі тыныс-тіршілігіне барлау жасалды. Сондай-ақ келесі күні «Баласағұн» орталық концерт залында қолөнер шеберлерінің көрмесі, форум қатысушыларына арналған ақпараттық тур және «Экологиялық туризмді дамыту стандарттары мен принциптері» тақырыптарында шеберлік сыныптары ұйымдастырылды. Форум жұмысына қатысушылар Тараз топырағынан табылған көне жәдігерлерді тамашалап, ұлт тарихының шежіресіне қанықты.
Бұдан кейін бұқаралық ақпарат құралдарының өкілдеріне арналған конференция өтіп, конференция барысында облыс әкімі Кәрім Көкірекбаев форумға қатысушыларды жамбылдықтар атынан құттықтады. Әкім өз сөзінде Жамбыл жерінің терең тарихына тоқталып, Елбасының «Болашаққа бағдар; рухани жаңғыру» бағдарламалық мақаласы бойынша облыста атқарылып жатқан жұмыстарды да әңгімеледі. Өз кезегінде «Атамекен» ұлттық кәсіпкерлер палатасы төрағасының орынбасары Юлия Якупбаева және Қытай Халық Республикасы Туризм академиясының президенті Дай Бин сөз алып, жалпы әлемдік туризм саласы туралы әңгімелей келе, Жамбыл жерінің туризмін дамыту туралы да ойларын ортаға салды.
Жалпы, Жамбыл өңірі еліміздегі тарихи мекендердің бірінен саналады. Көне замандардан бері жалғасып келе жатқан жәдігерлер көші, ұлт тарихында айтулы орын алатын кешендер де осы Әулиеата өңірінде орналасқан. Сол себепті өңір туризмін дамыту бүгінгі күні аса маңызды мәселелердің бірі. Осы орайда, форум аясында қазақстандық және Қытай туроператорларына арналған ақпараттық тур, Мәдениет және спорт министрлігімен ұйымдастырылып отырған «Қазақстанның Ұлы Жібек жолы бойынша саяхат» тақырыбында халықаралық фестиваль, қолөнершілер көрмесі, сонымен қатар қолөнер шеберлері, мектеп оқушылары және киім тігумен айналысатын облыс тұрғындарының қатысуымен «TARAZ FASHION DAY» байқауы өтті. Байқау барысында үздік шыққан үміткерлерге «Үздік сурет», «Үздік коллекция» және «Үздік қолөнер шебері» аталымдары табысталды. Ал қолөнершілер көрмесіне келген қонақтар облыс қолөнер шеберлерінің кәдесый өнімдерін, зергерлік бұйымдарды және теріден, қыштан жасалған қолөнер бұйымдарын тамашалады. Сол сияқты Өзбекстан және Қырғызстан елдерінің үздік дизайнерлері де өз киім коллекцияларын көпшілік назарына ұсынды. Сондай-ақ шетелдік меймандар үшін Қарахан, Айша бибі, Ақыртас тарихи кешендеріне де саяхаттар ұйымдастырылып, форум қатысушылары мен жергілікті туроператорлар арасында В2В форматында тәжірибе алмасу мақсатында кездесулер ұйымдастырылды.
Әулиеата өңірінің туристік әлеуетін арттыруға бағытталған форум барысында қазақстандық және шетелдік қонақтар үшін облыстың туристік әлеуеті туралы мол мағлұматтар берілді. Жамбыл жеріндегі тарихи кешендерді үш күн бойы тамашалап, тарихына үңілген шетелдіктер өңірдегі тарихи-мәдени нысандарға қызығушылық танытып, жоғары пікір білдірді.
Хамит ЕСАМАН,
«Егемен Қазақстан»
Жамбыл облысы
