Иә, бұл Елбасы Н.Назарбаевтың «Ұлы дала ұлағаттары» атты еңбегінің алтыншы бөлімінен алынған үзінді. Оңтүстік Қазақстан облысының әкімі Жансейіт Түймебаев өңіріміздегі ақсақалдар мен зиялы қауым өкілдерінің басын қосып өткізген дөңгелек үстел барысында да жастарға жөн көрсетуде ақсақалдық қасиеттің аттан түспегенін қалайтынын жеткізді. Сондай-ақ аға буынға Елбасының «Болашаққа бағдар: рухани жаңғыру» бағдарламалық мақаласын жүзеге асыру мақсатында 66 жоба бойынша 121 іс-шараны жүзеге асыру қолға алынғанын айтып, атқарылған жұмыстар жөнінде ақпарат берді.
«Сіздерді Елбасымыздың «Болашаққа бағдар: рухани жаңғыру» бағдарламалық мақаласын бірлесе жүзеге асыруға шақырамын. Алдағы кезде біз де талапты күшейте түсеміз. Облыстағы 720 мыңнан астам жылжымайтын мүліктің келбетін көріктендіреміз. Әлбетте, бұл ретте сіздердің көмектеріңізге сүйенетін боламыз. Жастарымыздың тәлім-тәрбиесіне, біліміне аса көңіл бөлуіміз қажет. Осы тұрғыда сіздердің қосар үлестеріңіз орасан зор. «Қарты бар ел – қазыналы ел» дегендей, сіздер біздің қазынамыз болумен қатар, бағыт-бағдар беретін даналықтың сарқылмас бұлағысыздар», деді Жансейіт Қансейітұлы.
Облыста Елбасының «Болашаққа бағдар: рухани жаңғыру» бағдарламалық мақаласын жүзеге асыру мақсатында 844 елді мекенде 3185 іс-шара өткізілген. Мақалада ерекше аталған жобаларды жүзеге асыруға 2022 жылға дейін 16,2 млрд теңге бөлу жоспарланып отыр. Бүгінгі күнде кәсіпкерлер, демеушілер тарапынан жалпы 30 млрд 350 млн теңгені құрайтын 529 өңірлік жоба қолға алынып отыр.
Бұдан бөлек, «Рухани қазына» кіші бағдарламасы бойынша «Ажарлы үй – ырысты» жобасы аясында 120-дан астам белсенді, ерікті жастар елді мекендерді абаттандыру мақсатында көмекке зәру 543 отбасының аулаларын тазалап, қоршауларын, қақпаларын сырлап, ауыл ажарының артуына өз үлестерін қосқан. «Рухани жаңғыру: Береке басы – бірлік» тақырыбында өткен кездесуде облыстық ардагерлер кеңесінің төрағасы Жеңісбек Мәуленқұлов баяндама жасап, елді бірлік пен ынтымаққа шақыруда ардагерлердің еңбегі орасан екенін атап өтті. Сондай-ақ ардагерлерді бағдарламалық мақаланың ел арасында өз деңгейінде насихатталуына күш салуға шақырды.
Ғалымжан Елшібай,
«Егемен Қазақстан»
