Кездесуде еліміздің жүз жылға жуық тарихы бар бас газетінің бүгінгі тынысы баяндалды. Мазмұндық сапаның күшейгені, әр салаға арнайы айдарлар мен беттер ашылғаны, халықаралық сараптамалық мақалалардың көбейгені сөз болды. Өз кезегінде сөз алған мұғалімдер педагогика саласындағы оң ізденістерге, әдістемелерге негізделген «Тәлім» және «Білім» бетіне байланысты оң пікірлерін білдірді. Оқығысы келген тақырыптар жайында ойларын бөлісті.
Мәселен, №9 мектеп-гимназияда өткен кездесуде сөз алған тарих пәнінің мұғалімі Ботагөз Нұрсейітованы елімізге тағдыр-талайымен келген ұлттар мен ұлыстардың тарихы қызықтырады. «Сталиндік репрессияның зұлматын басынан өткерген ұлыстардың әдет-ғұрып, салт-дәстүрі, мәдениеті туралы көбірек жазылса», дейді Ботагөз. Ал Алла Петровская бүгінгі жастардың тағдырына көбірек алаңдайды.
Ол ғаламтордағы жаңалық, оқиғаларға еліктеген жас өскіндердің арасында суицидтің, діни адасушылықтың тамыры неде, соған байланысты сараптамалық мақалалар көбірек жазылса деген ұсынысын жеткізді. Сонымен қатар көшелерге жаңа есімдер беріліп жатыр. Адамның аты көшеге қандай еңбегі үшін беріледі? Бармақ басты, көз қыстымен, тамыр-таныспен өтіп кеткендер жоқ па, неге белгісіз есімдер еліміздегі даңқты тұлғалармен алмастырылмайды десті мұғалімдер.
Қазақ тілі мен әдебиеті пәнінің мұғалімі Айгүл Есімбекованы ұлыстың ұйытқысы болып отырған оңтүстік өңіріне қарата айтылатын оғаш сөздер ойландырады екен. Сондықтан ол ұлттың ұстыны болып отырған аймақтың жақсылығы көбірек жазылса деген ниетте. Ал Шынар Айдосованы қоғамдағы мұғалімнің беделі толғандырады. Бұрын оқушылар ұстазын қатты құрметтейтін еді. Қадіріне жететін, еңбегін бағалайтын. Қазір мұғалім биліктегілердің айдағанымен жүретін пендеге айналып барады. Көше сыпырады, аула тазалайды. Сайлау өтетін қарсаңда үй-үйді аралап құжат жинайды. Бұған қашан тоқтам болады?!
№41 орта мектепте де өзекті мәселелер көтерілді. Мектеп директоры Айна Абылайқызы білім ошағында екі мыңға жуық оқушы оқып жатқандығын айтады. Мектеп ұжымы Елбасының «Болашаққа бағдар: рухани жаңғыру» мақаласына байланысты егемендіктермен емен-жарқын әңгіме-дүкен құрды. Өздерін толғандырған сауалдарына жауап алды. Оқушылардың концерттік бағдарламаларымен таныстырды.
Оңтүстікке белгілі ұстаз, тарихшы Өмір Шыныбекұлы арнайы сөз алып, ел газеті «Егемендегі» жақсы ізденістерге ілтипатын білдірді. Газет басшысы Дархан Қыдырәлінің Оңтүстікке келген сапарында өзін іздеп тауып, педагогика саласында пікірін тыңдағандығына қарапайым мұғалімді бағалағанына сүйінішін білдірді. Бас газеттің ұстаздар қауымы үшін үлкен ақылшы, көмекші екендігін айтты.
Мұғалімдерді толғандыратын сауал көп. Латын әліпбиі жайы, үштілділік мәселесі де көтерілді. Қай-қайсысы да мұғалімдерді айналып өтпейді. Тікелей айналысатын негізгі буын болғандықтан алаңдаулары заңды. Өйткені бүгін ұстазы мықтының озатын заманы.
Бақтияр ТАЙЖАН,
Ғалымжан ЕЛШІБАЙ,
«Егемен Қазақстан»
Оңтүстік Қазақстан облысы
