Мәжілістің Халықаралық істер, қорғаныс және қауіпсіздік комитетінің мүшесі, Президент жанындағы Адам құқықтары жөніндегі комиссияның төрағасы Сағынбек Тұрсынов Адам құқықтарын дамыту жөніндегі Қытай қорының делегациясымен кездесті.
Адам құқықтарын дамыту жөніндегі Қытай қоры бас хатшысының орынбасары Ванг Жианлин Қазақстан тәуелсіздік алғалы бергі жиырма жыл ішінде осынша өркендеп, оның жас астанасының заманға сай гүлденіп келе жатқанына қайран қалып отырғанын жасырмады.
Қазақстан Республикасы Президенті жанындағы Адам құқықтары жөніндегі комиссияның төрағасы Сағынбек Тұрсынов Қазақстанның құқық қорғау жүйесі жайлы білгісі келген қонаққа: «Қазақстанда адам құқығын қорғайтын екі институт бар. Соның бірі – Президент Жарлығымен құрылған Адам құқықтары жөніндегі комиссия. Құрамына құқық қорғайтын білікті заңгерлер, депутаттар, Ішкі істер, Әділет, Еңбек және халықты әлеуметтік қорғау министрлері, дін ұйымдарының өкілдері кіреді. Жыл сайынғы Базалық баяндама әлемдік тәжірибеден үйреніп, еуропалық, азиялық, Таяу Шығыс елдері халықтарының менталитетін ескеріп, кешенді әрі жүйелі жасалады. Көптеген халықаралық ұйымдармен, Еурокомиссиямен, Еуроодақпен байланыс жасап отырамыз. Жыл сайын адам құқы жөнінде баяндама жасап, ҚР Президентіне есеп береміз. Оны халықаралық ұйымдар мен ЕҚЫҰ-ның БҰҰ жүйесіне таныстыруға тырысамыз», деп өздері атқарып жатқан істер жөнінде баяндады.
«Егемен-ақпарат».