Аталмыш шара Ұлттық музейдің төл жобасы ретінде 2015 жылдан бері дәстүрлі түрде ұйымдастырылып келеді. Бүгінге дейін «Ұлттық музейге сый тарту» акциясы Алматы, Қызылорда, Шымкент, Ақтөбе, Орал, Петропавл қалаларында өткізілген.
Ұлттық музей директорының орынбасары Абай Сатыбалдиннің айтуынша, бүгінге дейін музей қорына 3000-нан аса құнды жәдігер қабылданыпты. Олардың қатарында 2016 жылы Рио-де-Жанейрода өткен Олимпия ойындарының чемпионы, боксшы Данияр Елеусіновтің де бокс қолғабы бар. «Қолғабымды жәдігерлер қатарына қосқаны мен үшін үлкен мәртебе. Бұл шараның жастар үшін маңызы зор. Жәдігерлерді көру арқылы ата-бабаларымызды тани түседі. Болашақта заттары осы музейден жәдігер ретінде орын алатындай тұлғалар көбейе берсін», дейді Олимпиада чемпионы.
Үшінші рет ұйымдастырылған «Ұлттық музейге сый тарту» акциясының қорытынды жиынында көрмеге тек биылғы жылы Орал, Петропавл қалаларында өткен шарада Ұлттық музей қорына қабылданған жәдігерлермен қатар, ХХVIII қысқы Универсиада және ЭКСПО-2017 халықаралық көрмесінен музей қорына қабылданған экспонаттар да қойылды.
Әли БИТӨРЕ,
«Егемен Қазақстан»
