«Астана» баскетбол клубының бас бапкері міндетін атқарушы болып Михаил Карпенко тағайындалды.
Михаил Владимирович Карпенко – ресейлік маман, 20 жылдық тәжірибесі бар бапкер. Өз мансабын Карпенко 1997 жылы балалар мен жасөспірімдер спорт мектебінде бастап, онда 10 жыл жұмыс істеген. Қызметінде М.Карпенко Саратовтың «Автодор» кәсіпқой клубын басқарған, Ростов-на-Донудың «Атаман» баскетбол клубында жұмыс істеген. Соңғы үш маусымда маман ақтаулық «Каспий» клубында болып, онда қазақстандық баскетболмен, ойыншылармен және ұлттық лига ерекшеліктерімен танысқан. Қазіргі спорт маусымында Михаил Карпенко «Астана» баскетбол клубы бас бапкерінің ассистенті қызметінде болған.
Сонымен қатар, қазіргі уақытта маман баскетболдан Қазақстан ұлттық құрамасының бапкерлік штабын басқарады. Карпенконың жетекшілігімен ұлттық құрама осы маусымда Әлем Чемпионатының іріктеу кезеңі аясындағы барлық матчын жеңіліссіз өткізді.
Команданы және ойыншыларды жақсы білуіне, клубтың негізгі міндеттері мен мақсаттарын түсінуіне байланысты, сондай-ақ, Қазақстан ұлттық құрамасының жақсы көрсеткіштеріне байланысты Михаил Карпенко «Астана» бас бапкері міндетін атқарушы болып тағайындалды.
