Аймақтар • 23 Қаңтар, 2018

Оңтүстік Қазақстан облысының кәсіпкерлері Атырауда алма өсіреді

469 рет
көрсетілді
1 мин
оқу үшін

Оңтүстіктен әкелінген жемістер Атыраудағы «Сарайшық» коммуналдық базарында арзан бағамен сатылуда деп хабарлайды Атырау облыстық өңірлік коммуникациялар қызметі.

Оңтүстік Қазақстан облысының кәсіпкерлері Атырауда алма өсіреді

​Оңтүстік Қазақстан облысында өсірілген 18 тонна алманың алғашқы топтамасы «Сарайшық» базарына 20 қаңтарда саудаға шығарылды. Жеткізушілер қалалық әкімдікпен келісімшартқа отырып, жемістерге нарық құнынан төмен баға бекіткен.

​- «DALA-FRUIT» компаниясының басшылығы тұрғындардың отандық ауыл шаруашылығы өнімдеріне деген сұранысы мен қызығушылығын арттыру мақсатында қалалық әкімдікке өтініш білдірді. Қазір Атырауға бірінші сұрыпты алманың үш түрі әкелінді, олар базар нарқынан 15-20 пайызға арзанға сатылады, - дейді қалалық кәсіпкерлік және туризм бөлімінің басшысы Руслан Дәулетов.

​Компания мұнайлы өңірге 18 тонна алма әкелген. Коммуналдық базарда оңтүстіктен келген алмалардың бір килограмы 230 теңгеден сатылуда. Негізі алманың орташа бағасы – 400 теңге. Сатылымның алғашқы күнінен бастап тұрғындардың отандық өнімге деген сұранысы жоғары екені байқалды. Жарты күннің ішінде бір тоннаға жуық алма сатылған.

​Егер өнімнің сапасы мен бағасы тұрғындардың көңілдерінен шықса, Атырауда алғашқы алма бағы болуы әбден мүмкін. Компания өкілдері алманы Атырауда да өсіруге ниетті. Облыстық әкімдіктен хабарлағандай, бизнесмендерге мемлекеттік қолдау шаралары көрсетіледі.