Әдетте «Гелендваген» көлігін жұрттың бәрі біледі. Оның бағасының да қымбат, мүмкіндігінің де жоғары екені белгілі. Ал мына бұрын жұрт естіп-көрмеген «Қазақваген» көлігінің құрастырылуы шынында да елді елең еткізді.
Көлікті ойлап тапқан өнертапқыштың аты-жөні – Төлеген Юсупов. Талас ауданының тумасы. Қарапайым қойшы үш дөңгелекті мотоциклден көлік жасап, оның атын «Қазақваген» деп қойыпты. Алғашында Төлегеннің бұл көлігіне қызыққан көршілері оны видеоға түсіріп алып, әлеуметтік желілерге жариялап жіберген. Содан бері «Қазақваген» көлігін қызықтаушылар да, оған тамсанушылар да көп.
Бір қарағанда «Гелендваген» көлігіне келетін «Қазақваген» сағатына 80 шақырым жылдамдықпен жүреді. Тағы бір артықшылығы, 100 шақырым қашықтыққа 1 литр жанармай жағады екен. Бұл көлік негізінен күн батареясымен жұмыс істейді.
«Қазақваген» жол талғамайды. Үш адам сыятын орны мен жүк салғышы бар. Төлеген Юсупов бұл көлікпен мал бағып, тіпті жақындары мен достарының тойына да баратынын айтады. Ал аталған көлікті өнертапқыштың қалай жасап шығарғанын білгісі келетіндер де көп. Әуелі өнертапқыш үш дөңгелекті мотоциклге қозғалтқыш пен руль орнатқан. Одан кейін сыртын алюминиймен қаптапты. Өзі көлікті құрастырып шығаруда ешқандай шығын болмағанын айтады. Оның ішінде қуаттағыш, пеш, кондиционер де бар екен. Дауылда да, жауында да, аяз бен аптап ыстықта да жол талғамайтын «Қазақваген» көлігіне біраз азаматтар тапсырыс беріп қойыпты.
Хамит ЕСАМАН,
«Егемен Қазақстан»
Жамбыл облысы
