Оңтүстік Кореяның Пхенчхан қаласында XXIII Қысқы Олимпиада ойындарының шымылдығы түріледі. Әрине төрткүл дүние көз тігетін дүбірлі додада еліміз негізінен қысқы спорт түрлері қанат жайған Шығыс Қазақстан облысының спортшыларына сенім артатыны белгілі. Сонымен байрақты бәсекеге Шығыстан кімдер барады?
Облыстық дене шынықтыру және спорт басқармасы баспасөз қызметінің таратқан мәліметтеріне сүйенсек, төрт жылдықтың негізгі сайысында ұлттық құрама сапында Шығыс Қазақстанның 12 спортшысы спорттың 4 түрінен ел намысын қорғайтын болады. Олар: Алексей Полторанин, Елена Коломина (екеуі де Риддерден, шаңғы жарысы), Дмитрий Рейхерд (Өскемен, фристайл-могул), Юлия Галышева, Павел Колмаков, Аяулым Әміренова (үшеуі де Өскеменнен, фристайл-могул), Галина Вишневская (Семей, биатлон), Сергей Ткаченко (Риддер, шаңғымен трамплиннен секіру), Виталий Витенко, Ольга Полторанина, Елизавета Бельченко және Василий Подкорытов (төртеуі де Риддерден, биатлон).
Азамат ҚАСЫМ,
«Егемен Қазақстан»
Шығыс Қазақстан облысы
