Кеше Орталық сайлау комиссиясының төрағасы Қуандық Тұрғанқұловтың төрағалық етуімен Комиссияның отырысы өтті. Отырыста Қазақстан Республикасы Парламенті Мәжілісі депутаттары мен мәслихаттары депутаттарын сайлау бойынша сайлау науқандарын ұйымдастыруға қатысты бірқатар маңызды қаулылар қабылданды.
Қабылданған құжаттардың қатарында Сенім білдірілген адамдарды тіркеу тәртібі шарттары туралы нұсқаулық, сондай-ақ Дауыс беруге арналған жәшіктерді пломбалау немесе мөрлеу тәртібі туралы нұсқаулық бар. Бұл құжаттар негізінен техникалық сипатқа ие және сайлау комиссияларына сайлау рәсімдерін өткізу тәртібін түсіндіру үшін қажет. Ал Сенім білдірілген адамдарды тіркеу тәртібі мен шарттары туралы нұсқаулық саяси партиялар мен кандидаттардың сенім білдірілген адамдары ретінде тіркеле алмайтын адамдар тобын белгілейді. Олар – Қазақстан Республикасының азаматы болып танылмайтын адамдар, сайлау комиссияларының мүшелері және саяси мемлекеттік қызметшілер.
Отырыста қабылданған құжаттардың тағы бірі – Сайлау бюллетеньдерін дайындау, жеткізу және есепке алу тәртібі туралы нұсқаулық. Бұл қаулының маңыздылығы алдағы сайлауды ұйымдастыру мен материалдық-техникалық қамтамасыз етуде жатыр. Отырыста сондай-ақ Орталық сайлау комиссиясы Парламент Мәжілісі депутаттарының кезектен тыс сайлауында және мәслихаттар депутаттарының кезекті сайлауында шетелдік бұқаралық ақпарат құралдарының өкілдері сайлауды байқауды Қазақстан Республикасы Сыртқы істер министрлігі берген аккредиттеу туралы куәлігі болған жағдайда жүзеге асыруға құқылы деп белгіледі. Бұл ретте халықаралық байқаушыға, сондай-ақ шетелдік бұқаралық ақпарат құралдарының өкіліне жеке басын куәландыратын құжатын көрсеткен кезде оған бір аудармашы ілесіп жүре алады.
Орталық сайлау комиссиясының қаулысымен сайлау туралы заңмен көзделген тәртіп бойынша сайланғанға дейінгі кезеңге Маңғыстау, Шығыс Қазақстан, Алматы облыстарының облыстық сайлау комиссияларының және Алматы қаласының аумақтық сайлау комиссиясының жаңа мүшелері де тағайындалды.
Отырыстан кейін өткен брифингте Ортсайлауком төрағасы Қуандық Тұрғанқұлов алдағы сайлауда сайлаушылар әртүрлі үш бюллетень алатынын атап өтті. Төрағаның айтуынша, олардың біреуі Қазақстан Республикасы Парламенті Мәжілісі депутаттарының сайлауында саяси партия үшін дауыс беруге арналған. Екінші бюллетень – облыстық мәслихат депутаттығына кандидат үшін дауыс беруге, ал үшінші бюллетень – аудандық немесе қалалық мәслихаттың депутаттығына кандидат үшін дауыс беруге арналған бюллетень болып табылады. Астана мен Алматы қалаларының сайлаушылары екі бюллетень алады. Өйткені, бұл қалаларда аудандық мәслихаттар жоқ. Сондықтан онда сайлаушылар өз дауысын саяси партияға беруі және қалалық мәслихаттың депутатын сайлауға тиіс болады.
Қазіргі уақытта Орталық сайлау комиссиясы барлық қажетті дайындық шараларын өткізуде. Алдағы сайлауға тиімді ақпараттық қолдау көрсетуге, сонымен қатар, сайлауды ұйымдастырушыларды оқытуға күш жұмылдырып отыр. Сайлауды ұйымдастырушылар үшін республикалық семинар-кеңестен басқа өңірлік семинарлар да өткізілетін болады.
Әлисұлтан ҚҰЛАНБАЙ.